S’Wuchenändi fallt ballontechnisch widder emoole ins Wasser, aber der Benj isch immer fir e glaini Schandtat guet. So lytet är am Fryttigmorge aa und ladet zem-e Obefährtli im Sässeli yy. Das losst me sich natyrlig nit entgoo und so dräffe mir uns am halber Säggsi Zoobe bi yym und faare no Tennike uff e Hornusserblatz. Die glaini Chatz isch gschnäll zem Sagg uss und scho bald sin mir zem Start berait. Mir hebe am halber Siibeni ab und butze unseri Schuesoole an de Baimkroone. Laider hets in de untere Schichte nit vyyl Wind und au d’Richtig isch nit ideal. So styyge mir langsam hecher und gniesse die scheeni Sicht uff’s Baselbiet. Im Mittelland faart iber St. Urban unsere Frind Stefu mit sym ADR Ballon und mäldet, ass är uff 2000 müM Faart mit 30 km/h ka haigi. Mir styyge also wyters und gnapp uff 2000 müM hän mir Fahrt mit 15 km/h in Richtig Nordost. Laider derfe mir do wäge-n-em Luftruum nit hecher go, aber es isch au eso scheen uff däre Hechi d’Fiess im Freie z’bambele loo. Via Buggte, Rimlige und Waislige faare mir no Ammel. Derte feen mir dr Abstiig aa und dr Ballon drait drby ändloos im Krais. Langsam faare mir no Kienbärg und derte goots tief iber die scheen bliende Chriesiebaim. Unter uns verfolgt uns e ganzi Grubbe Kinder wo werwaist, wenn ass mir lande. No däm mir unsere Kinderschatte gnueg ummdriibe hän, lande mir no gnabb zwai Stunde zwische de Baim näbe-n-em Fäldwäg. Unseri Nochfaarer Andy und Jessica sin sofort do und so pagge mir die Chatz in Sagg.

Merci Benj, ass ych die scheeni Faart mit Dir ha derfe gniesse.