Dr Bluetmond isch verby, aber no dämm mir die geschtrigi Morgenfaart wäge zächem Näbel hän miese absage und mir au die baide Oobefaarte uffgrund vo bockigem Wind nit gmacht hän, sin mir bluetrinschtig am Morge mit grosse Erwartige uff d’Ballonwiise gfaare. Es het zwor no Bewölkig kaa, aber doch mit grosse Lecher drinne, dass me e Start het kenne in Aagriff nää. Mir hän unsere Ballon ufgstellt und unseri Passagier yyglaade und sin am 8:20 in d’Luft. Damit mir nit mit andere Balleen zämmestoosse, stiige mir sehr langsam hecher. Zwischedure durstoosse mir glaini mystischi Näbelschwade und kemme schlussändlig bi 2300 müM iber d’Wolggeobergränze. Alles was vo unte no dischter und grau ussgsee het isch jetzt schneewyss und aifach wunderscheen. Iber uns isch der blauschti Himmel und mir häne e scheeni glaari Sicht. Nodisnoo dauche au die ander Balleen uff und mir finde uff 3000 müM e Windstremig, wo uns in Richtig Obersachse bringt. Dert gseen mir, ass d’Wolkedeggi ebefalls uffgrisse isch und mir ooni Brobleem kenne absingge. Zerscht aber gniesse mir die scheni Sicht uff e Piz Riein, dr Vorab gletscher und dr Tödi. Unter uns gseen mir dur ainzelni Lecher in de Wolgge Illanz und wo mir dr Vorderrhyy iberquert hän, entschliesse mir uns fir e rasche Abstiig. Mir kemme praggtisch iber em Hochstuggliballon obenabe und faare tief  iber de Baim und an noch an Felswänd verby s’Tal druff. Dr Wind isch aber seer schwach und mir versueche uns no Waltensburg iibere z’tripple, aber mir schaffe das nit. Am Hang vo Obersachsen hetsch no grossi Näbelschwade wo am Bode uffligge. Drumm blybe mir im Tal unde und versueche unser Glygg numme wenigi Zentimeter iber de Tannespitze. Unseri Nochfaarer d’Birsigratte, sin unterhalb vom Hang wo mir sin und warte druff, ass si uns kenne in Empfang nää. Aber mir faare wyters parallel zum Waldrand, bis e glaine Wiisestraife vor uns in Wald iineluegt. So lande mir ganz sanft uf däre Wiise und trage dr Ballon zer nooche Stroos. No däm die letschte Foddeli im Kaschte sin, legge mir dr Ballon ab und pagge alles yy. Uff dr Startwiise stosse mir mit unsere Passagier aa und erhebe si in Ballonadelstand.

d’Marianne wird zer Baronin von und zu Illanz

dr Sandro zem Graf vom Waldtobel zu Waltensburg