Fir vorussichtlig die letschti Morgenfaart an dr Ballonwuche Flims, faare mir zem Startplatz. Es sin ähnlichi Wind aagsait wie geschtert, numme dirfti’s e bitzeli gschnäller vorwärts goo. Mi Vatter Christian het sich entschiide, no-n-ere Pause vo merere Joor widder emoole bi mir in Korb z’stiige. Zämme mit unsere baide Passagier, dr Judith und dr Rahel, hebe mir kurz no de Achte zer Faart ab. Mir stiige zerscht langsam hecher und hän pragtisch kai Wind. Erscht uf 2300 Meter bikemmer mir Faart uf, aber mir stiige rasch wyters, damit mir megligscht hoch iber dr Krete sin, wenn mir in die erwarteti stargi Stremig kemme. Zuedäm wän mir vermiide, ass mir nit iber e Ringelspitz kemme sondern iber e Casonsgroot, denn hinter em Ringelspitz hets ainigi Wulge wo stationär sin und das dytet uf stargi Turbulänze hii. Mir hän mittlerwyle 3500 müM erraicht und hän satti 55 km/h druff. Mir stiige no wyters uf 3700 müM und faare iber d’Sardonahitte. Dr Gigerswaldstausee liggt näbe uns und mir beobachte e Wulge wo rotiert.  Uf dr Hechi vom Wysstannetal singge mir widder ebbis tiefer, damit mir meer Kurs in Richtig Toggeburg hän. Mittlerwyle het s’Tämpo (max. 65 km/h) wider abgno, und mir gseen scheen d’Region vo de Flumser Bärge. Mittlerwyle mälde anderi Balleen doch e baar Problem mit Turbulänze, aber mir hän bis jetzt absolut kaini Problem. Bi Unterterzen kemme mir iber e Walesee und mir stiige uff 2700 Meter ab. Mit Faartrichtig Stein im Toggeburg, iberquere mir mit em Frümsel d’Kurfirste. Mir singge langsam ab und faare ins Tal use. Dert beschleunige mir unsere Abstiig und versueche e Landeblatz z’sueche. Mir wärde aber vom Hangwind widder zruggzooge und so mien mir widder hecherstiige, um wyters ins Tal faare. Erneut stiige mir rasant ab und faare jetzt ganz tief langsam iber d’Wiise. Uf eme frisch gmaite Fäld näbe-n-em Schitzehuus nämme uns d’Birsigratte in Empfang. E tolli Faart isch z’Änd und wie sich am Nommidaag denn zaigt, isch das au die letschti Faart an dr Ballonwuche Flims 2015 gsii. An alli wo die wunderscheeni tolli Ballonwuche organisiert hän und an alli hälfer e grosses DANGGERSCHEEN.