Und aimool mee isch widder e wunderscheens Wuchenändi im Herbscht aagsait. Mir dräffe uns mit de Passagier und faare no Zäll im Luzärnische Hinterland. Mit vo dr Partie isch dr Thomas mit sym Ballon und Team. Mir frooge e Buur, ebb mir uff sym Land derfe starte und beraite denn unseri Balleen fir e Start vor. Dr Buur und sini Kinder luege uns drby gschpannt zue. Kurz no de Elfe sin mir berait fir e Start und hebe ab. Mir hän s’scheenschte Wätter und d’Alpe zaige sich scho wenigi Meter iber em Bode in voller Bracht. Langsam stiige mir hecher und sueche e geaigneti  Streemig, wo mr e bitz vorwärts kemme. Laider isch aber kai Wind spyyrbar. Jetzt gseen mir drfir die ganzi Alpeketti vom Alpstai bis zu de Fryburger Alpe vor uns. Sämpcher-, Vierwaldstätter-, Zuger-, Halwyler-, Baldegger- und Ziirisee, alles gseetme, sogar dr Rocheturm vo Basel und dr Euroairport. Mir sin jetzt scho uff 2500 müM und steen praggtisch immer no iber em Startblatz. Wo mir uff 2700 müM immer noonig vorwärts kemme, entschaide mir uns fir e Abstiig uff 2100 müM, denn derte hän mir wenigschtens 8 km/h Fahrt ka. In ere dinne Schicht finde mir dä Wind und faare ins Wauwylermoos uuse. Dr Thomas mäldet pletzligg, ass är uff Flightlevel 100 (3100 müM) mit 22 km/h in Richtig Emme faart. Mir feen widder aa stiige, mälde uns bi dr Flugsicherig Züri Info und verlange d’Freygoob fir uff FL 100 uffe. Uff däre Hechi sin drumm scho die grosse Flieger vo Klote unterwäggs. Dert obe aakoo, nämme mir au scho die erwarteti Faart uff. Iber Nottwil und Sämpach goots iber s’Schlachtfäld. D’Schlachtkapälle kenne mir scheen gsee und au dr Sänder vo Beromünster isch guet sichtbar. Mir entschaide uns iber em Tanklager vo Rotheburg diefer z’goo, damit mir nit diräggt uff e Flugblatz Ämme kemme. Denn derte isch kai betriib und s’Areal isch abgschlosse. Langsam faare mir in Richtig Buchrain und entschaide uns in dr Region vo Äschebach  e Landeblatz z’sueche. Mir kemme fascht sänkrächt obenabe und setze sanft in eme Fäld mit Wintersaat uff. Unsere Nochfaarer dr Urs isch sofort zer Stell und mir trage dr Ballon zum nooche teerte Stressli, wo mir en widder zämmelegge. Nach iber zwaiehalb Stund im T-Shirt goot so e wunderscheeni Faart z’Änd. Mir stoose mit Champagner aa und erhebe unseri Passagier in Ballonadelstand. Mit eme Abstächer ins Restaurant zer Schlacht goots denn widder Haimet zue.