Aigendlig het dr Sven uff sy 50’gschte e Ballonfaart gschänggt griegt, aber iirgenwie het är sich nie kenne e Schupf gää und das Gschängg realisiere. Zem Glygg het sy Soon e bitzeli Schwung in die Sach brocht und het kurzerhand e baar Daate mit mir veryybart. Dr Sven het drufabe ze Wiehnachte sinere Frau Alice ebefalls e Ballonfaart gschänggt, damit si gmainsam in d’Luft kenne. Eso hän mir scho bim erschte Versuech Glygg mit em Wätter ghaa. Mir dräffe uns am achti am Morge in Prattele und faare no Thun. No-n-em Belchetunnel tauche mir in dr Näbelsubbe, aber kurz no Deitinge leest sich dr Näbel uff und die ganze Alpe ligge beraits vor uns. In Thun hole mir unsere dritte Passagier, dr Toni, am Bahnhof ab und faare no Steffisburg zem Startblatz. Uff ere gfrorene Wiise, wo mir beraits scho friener gnutzt hän, beraite mir näbe de Hyser unsere Ballon fir d’Faart vor. D’Alice und dr Sven wärde instruiert und denn feen mir mit em Fille vom Ballon aa. Es het grad no gnueg Blatz, ass unsere Ballon nit an de Hyser aakunt, aber d’Lyt hän jetzt drfir e ungweenlige Sunnestoore vor de Fänschter. Iberhaupt isch die ganzi Nochberschaft mittlerwyle uff uns uffmergsam worde und stoot an de Fänschter odder uff de Terasse und verfolgt gschpannt wie mir starte. Am 10:50 hebe mir bi beschte Bedingige ab und stiige zerscht langsam hecher und gniesses, wie alli unter uns an Himmel stuune und uns zuewingge. Iber dr Grundschicht hets e Windstremig nach Norde, das isch die abfliessendi Kaltluft uss de Bärgtäler. Drum stiige mir gschnäller, damit mir nit z’fescht ins Mittelland uuse kemme. Ab 2000 Meter Hechi kemme mir in erwartete südwescht Wind und hän e Faartgschwindigkait vo 30 km/h. S’Thuner Seebeggi liggt scheen unter uns und dr See glitzeret vom Sunneliecht. Dr Näbel het sich im Mittelland scho bis zem Jurasydfuess zurggzooge und isch dorum fir uns kai Problem me. Mir sin jetzt beraits uff 3000 müM und langsam drait dr Wind wie vorussgsait no Weschte. Mir hän aigendlig d’Absicht kaa, no Sarne z’faare und derte z’lande, aber mit dr Gschwindigkait vo 35 km/h wäre mir berait in ere Stund derte und mieste wie denn lande. Drum entschaide mir uns, mit dr tiefere Windschicht entlang de Voralpe z’faare. Mir schigge unsere Noochfaarer via Äntlibuech in Richtig Luzärn. Wunderscheen kenne mir die ganzi Alpeketti vo der Fryburgeralpe bis zem Alpstai gniesse. Flühli liggt unter uns und dr Pilatus kunnt langsam necher. Mir gseen beraits d’Godelbaan am Saili faare und au’s Luzärner Seebeggi isch beraits sichtbar. Mir beobachte wie zwai Balleen uff dr Allmänd näbe-n-em Stadion uffstiige. Es sin zwai Frinde uss däre Region, wo mir iber Funk begriesse. Mir hän uns inzwische entschiide, ass mir wyters bis zem Ägerisee faare. Mir sin jetzt beraits scho zwai Stunde in dr Luft. Die baide Balleen stosse uff unseri Heche und sin ganz nooch. S’Luzärner Seebeggi hän mir scho iberquert und d’Rigi, d’Keenigin vo de Alpe, ruggt necher. Scheen gseen mir d’Lyt uff dr Terrasse, wo d’Sunne statt dr Schnee gniesse. Vor Morgarte entschaide mir uns langsam tiefer z’goo und in dr Region vo Rooteturm zer Ändlandig aa z’setze. Noo däm mir doch seer rassig abgsungge sin, damit mir nit z’fescht abtriibe wärde, fange mir dr Ballon wenigi Meter iber em Boode ab und leen uns no iber e Bach triibe. Uff ere scheene Wiise setze mir sanf uff und trage dr Ballon zum nooche Streesli. Dr Urs isch ebefalls glyy zer Stell und so pagge mir alles widder uff unsere Aahänger. No dr Arbet wärde unseri baide Passagier mit Champagner in Ballonadelstand erhobe, bivor mir uns widder uff d’Haimrais mache. E Faart vo drei Stund und zwanzig Minute het uns vo Steffisburg no Roteturm gfiert, das sin ebbe 90 km Streggi.

Was fir e Wiehnachtsgeburtsdaagsgschängg!