Laider sin Prognose fir e 30. Dezämber 2015 nit e so guet gsii fir e Ballonfaart. Es liggt im Mittelland e zächi Näbeldeggi wo sich nur wenig uffleest. Das isch beschtimmt nit e gueti Vorusssetzig fir zem am Morge frie loos z’faare, denn s’Risiko ass me ooni Start widder haime goot isch aifach z’groos. Do gliggliger Wyys git’s jo no Kollege wo an ain dien Dängge. So lytet dr Urs vor em Mittag aa und froogt, ebb ych Luscht haigi, bi iim in Flieger z’gumpe. Notyrligg muess ych mir das nit zwaimool iberlege. So dräffe mir uns uff die Zwai am Flugplatz und mache dr Flieger startklar. Zerscht emool mien mir drfir anderi Flieger ummestoose, damit mir dr Lift mit em Urs sinnere Piper Super Cup kenne bediene. Wo d‘ Hotel Bravo Papa Quebeck Kilo, so haisst die Maschiine, uff em Vorfäld berait stoot, foot dr Urs mit sym Kontrollgang aa. Alles wird genau unter d’Lupe gnoo, ebb’s au funktioniert. Au ych lueg alles aa, obwool ych vermuetlig nit gmergt hätt, wenn d’Helfti von Flugi wurd fääle! Aaschliessend geen mir in’s Biiro uns go aamälde und es git e letschte Wättercheck. Denn hipfe mir baide in dä Flieger und dr Urs erklärt mir alles ganz genau. Uff dr Motor isch gschtartet und dr Propäller drillt, jetzt muess nur no s’OK vo dr Flugsicherig koo. Gly druffabe rolle mir uss dr GAGBA (General Aviation Gnosseschaft Basel) und faare in Richtig Pischte via Fox 33-15, odder wie au immer. Ych hätt mi scho finfmool verfaare! Will no e Easy Jet im Aaflug isch mien mir warte, drnoo kunnt no aine wo vor dr Querpischte startet. Drum längts nit fir uns zem Starte, will beraits dr näggschti im Landeaaflug isch. So jetzt haissts LINE UP RUNWAY 15. Wo drie ander Maschiine ab dr Pischte isch,derfe mir starte. Kuum git dr Urs Stoff, sin mir au scho in dr Luft. Scheen gseen mir uff’s Vorfäld vom Euroairport und dr Tower. Mit ere Linkskurve mache mir d’Pischte frey und visiere dr Phunggt Echo aa, das ische e Insle im Rhyy. Mit ere Rächtskurve goot’s in Richtig Basel. Dr beschaideni Rocheturm gseet me vo wytem und ains isch glaar, kai Pilot kennti dä verfääle, wenn är wott. Iber Rieche goots zem Frässbalgge, das isch dr wichtigi Kontrollphuggt Sierra fir d’Privatfliegerei. Näbe uns isch d’Chrischona mit em Sändeturm und bi Schopfhaim het’s no die letschte Näbelfätze. Mit fliege wyter’s iiber Augscht und Rhyfälde, s’Fäldschlessli gseet nit numme im Glas guet uss. S’Fickdaal liggt no unter em Näbel und so mache mir mit eme Schwängg nach Süüde unsere Fluug via Farnsburg, Gälterkinde no Ammel wyters. Will mir mittlerwyyle 1800 müM erraicht hän, gseen mir d’Alpe wunderscheen. Im Mittelland liggt alles innere dichte Subbe, drumm fliege mit wyters dr Jurasiidkrete nooch. Unter uns gseen mir die alti Haustaistreggi und Diegte mit dr Autobaan, voor uns gseet me dr ganzi Jura bis zem Chasseral. Komischerwyys het’s aber in Balsthal kai Näbel, dä leest sich in dr Kluus uff. Via Balmbärg, Wyssestai goots wyters bis zem Chasseeral, wo mir uns nommol e letschte Bligg uff die ganzi Alpeketti genne. Definitiv isch es aber e guete Entschaid gsii, die Voralpefaart z’verschiebe. Mir schwängge nach Norde und iiberfliege der Bottaturm vo Moron, wo doch ainigi Lyt e Wiehnachtsverdauigsspaziergang unternoo hän. Via Biesserach Nunnige goots wyters no Buebedorf und Lieschtel. Derte mäldet sich dr Urs bi Basel aa und verlangt d’Freygoob fir en Yyfluug in d’CTR Basel zem Lande. Mir bikemme d’Freygoob und fliege via dr Phunggt Sierra (Frässbalgge) und widder via Echo parallel zer Pischte 15, das nennt me Down Wind. Bald scho git uns dr Controller s’OK fir d’Landig uff dr grosse Pischte. Mir draye no links und schwängge uff d’Pischte yy. Die Pischte isch jo fir so-ne Grasshipfer wirgligg gross, aber wo-n-ych realisier, ass dr Wind jo genau quer zer Pischte goot, gseet dä Aafluug scho e bits komisch uss. Dr Bug mit em Propäller luegt alles andere als in Richtig vo dr Pischte, aber me mergt, ass dr Urs die Sach total im Griff het. Suuber setzt är uff und losst dr Flieger ussrolle. Via dr näggschti Rollwäg verleen mir d’Pischte und rolle zrugg zer GAGBA. Mir versorge dr Flieger zrugg in Hangar und das isch es denn gsii. Dangge em Urs wo mir die wunderscheeni Erfaarig ermeglicht het. Zem Glygg muess ych jetzt nit entschaide, was besser isch, Ballonfahre oder Fliege. Me verglycht jo schliesslig au nit Epfel mit Biire. Hauptsach me isch iber de Wulgge, dert isch d’Freyhait no gränze…. (odder so)