Faart iber Moschtindie

Hitte stoot e Faart fir unsere Sponsor Migros iber Moschtindie uff em Programm. Uss dämm Grund haissˋs zerscht emool frie uffstoo. Am halber vieri schällt dr Wegger und no-ne-ere Duschi wärde dˋNoochfaarer abgholt und mir faare no Sulge. Derte dräffe mir uns bi dr Firma Wittwerheizungen mit unserem lokale Ballenlerkolleg Marcel Wittwer. Au unseri finf Passagier dräffe mir derte und feen uff dr Wiise hinter em Gschäft unseri Balleen aafo usspagge. Dr Marcel macht mit sim Smilyballon die erschti Schuelfaart mit sym neye Faarschieler. Am viertel vor Achti sin mir startberait und mir hebe ab. Mir stiige langsam hecher und orientiere uns zerscht emool. Mir gseen scheen Bischofszäll und au Fraufäld gseet me scheen. E bitzeli im Dunscht gseet me au dr Säntis. Do mir nur wenig Faart mach mit dr Biise, stiige mir hecher, damit mir iber die Dunschtschicht kemme. Uff 1300 müM hän mir e wunderbari Sicht uff dr Bodesee und au d’Alpe sin jetzt glaar zˋgsee und zwor wytt bis ins Eschtrychige yyne. Mir hän jetzt e lichte Weschtwind und mir stiige hecher, zem luege ebb’s naymets e Schicht mit mehr Wind het. Es blybt aber sser langsam und mir entschaide uns, no dämm mir alli d’Ussicht gniegend gnosse hän, widder fir e Abstiig, zem mit dr Biise wyter z’faare. Mir kemme iber e scheene Guetshoof mit ere grosse Rosskopple und es goot wyters iber Thur, wo e bitz schlammig drhär kunnt. E Hof mit eme Turm wo fascht wie ne Kirche ussgseet entpuppt sich als Saufarm und e baar Minutespeeter faare mir iber e Kamelfarm, was es in dr Schwyz nit alles git! Mir iberquere e grossi Laitig, singge ab und lande uff ere grosse Wiise grad bim ene Fäldwääg. Unseri Verfolger d’Birsigratte sin au scho do und so pagge mir dr Ballon zämme. Im Aaschluss erhebe mir unseri Passagier in Ballonadelstand und stoose mit eme Glas Champagner aa. E Faart in dr Oschtschwyz isch mit Sicherhait emool e zwaistindigi Aafaart wärt.

Veraltete PHP-Version im Einsatz
Der Seiteninhaber muss die Version auf mindestens 7.3 erhhen.