Do an Uffaart e zimmlig stargi Biise bloost, verschiebe mir unseri Friehligsfaart, wo dr Hans als Abschlussgschängg fir sini langjeerigi Vorstandsarbet im Aeroclub Regio Basel bikoo het, uff dr Fryttig. Mir dräffe uns am Morge am fimfi und faare no Diegte wo unsere dritte Passagier wartet. Gmainsam goot’s uff e Hornusserblatz in Tenniken, wo mir unsere Ballon fir e Start vorberaite. In dr Zwischezyt isch es hell und mir starte am 6:25 zer Faart. Mir stiige zwische de Baim use und wärde scho vo dr Morgesunne begriesst. Es isch herrligs Wätter und mir hän scho uff gringer Hechi e tolle Rundbligg uff Basel, dr Schwarzwald, s’Mittelland und d’Alpe. Es het iber dr Grundschicht no e langsami Biise und mir stiige hecher uff 1000 müM. Derte finde mir e Streemig wo uns no Siide ins Mittelland bringt. Do d’Wätterstatione im Mittelland Windstilli aazaige und es am Siidfuess vom Jura kai Näbel het, entschaide mir uns fir e Faart ins Mittelland. In dr Zwischezytt isch unsere Kolleeg dr Werner ebefalls mit sym Ballon in Diegte gschtartet und faart numme e baar hundert Meter näbe-n-uns uff glycher Hechi. Mir sin jetzt iber Eptinge und gseen uff’s neye Portal wo die dritti Belchereehre  sotti uuse koo und scho bald druff wird au die anderi Sytte sichtbar, wo beraits dr Boorer am loche isch. Wyters fiert uns die Faart iber Wange bi Olte no Rothrischt, wo unter uns e groose rotie Harassebuurg zaigt, dass das d’Haimet vo Rivella isch. Wo mir Rothrischt hinter uns gloo hän und iber dr grossi Boowald bi Vordemwald faare, feen mir langsam a stiige. Mir wänn doch dr Rundbligg no e bitzeli gniesse. Uff 2500 müM gseen mir wider zrugg uf Basel mit em Rocheturm und em Euroairport. Uff dr andere Sytte gseet me d’Bärge vom Alpstai bis ze de Frybourgeralpe. Bi Burgdorf erkenne mir e Huffe Balleen, wo an dr Schwyzermaischterschaft vom Haissluftballonfaare um e Titel kämpfe, aifach fantastisch. Mittlerwyle faare mir widder mit dr Biise no Weschte in Richtig St. Urban und entschaide uns derte diefer z’goo und e Blatz fir unseri Landig z’sueche. Wo mir aber no-n-em Absingge dief iber de Baim sin, drybt uns dr Wind retour in Richtig Glashitte. Mir schigge unseri Nochfaarer dert hii, wo si uns uff ere frisch gmaite Wiise in Empfang nämme. No zwai-e-halb Stunde findet die Friehligsfaart iir Ändi. Mir pagge zämme und stosse mit eme Glas Champagner zämme aa. In dr Säägi vo Vordemwald dräffe mir s’andere Ballonteam und gniesse s’scheene Wätter im Garte bi-n-eme Plättli.