No aim Daag Rääge, kemme alli ganz giggerig uff e Startblatz zem die neyschte Meteonews z’gheere. Es isch nit ganz so aifach zem entschaide, ebb me e Faart uss em Tal use ka mache. Ainersyts zaige gwissi Statione vyyl Wind aa und andersyts zaigt oobe d’Richtig in e schwiirigs Gebiet zem go Lande. Mir beraite dr Migros Bio Ballon zem Start vor und hebe kurz vor de halber Achti ab. Langsam stiige mir hecher und iebe uns mit em Léon sym Ballon im Ballonkisse. Me sait däm eso, wenn zwai Ballonhille sich in dr Luft dien beriere. Das isch vellig ungfeerlig, do sich die zwai Balleen sofort gegesittig vonenander abstoosse. Damit mir nit andere Balleen dr Start erschweere, stiige mir ebbis schnäller hecher. Dr Hochstuckli Ballon mäldet uns, ass är uff 2700 Meter e scheeni Fahrt het in Richtig Thusis. Mir entschaide uns ebefalls uff die Hechi z’stiige und ins Domleschg z’faare. Wo mir uff 2200 Meter sin, schwirre pletzlig ainzelni Schneefleggli im Ballonkorb umme. Mir faare unter der Wulgedeggi sin scho iber dr Rhyschlucht Ruinaulta. Unseri Passagier find, dass es Zyt sigi, zem sich e Röteli z’gnämige, numme dr Pilot blybt fir aimool Trogge! Dr Wind wird ebbis langsamer und anderi Balleen schliesse zu uns uff, drfir foot d’Sunne aafo schyyne und d’Schneeflogge funggle wie duusigi vo Diamante. Mit em Gian-Marco verastalte mir e wunderscheens Balett am Himmel. Emool oobe driber und denn widder unte dure. Mir sin scho e Stund in dr Luft und mir gseen, ass es nommol mindischtens aini bruucht, bis mir im Domleschg sin. Mir hän aber no Gas fir iber 3 Stund, also kai Brobleem. Innere dynne Schicht faare mir scheen iber d’Krete ins Domleschg yy und kenne denn e bitz hecher no Siide korrigiere. Mirschigge unseri Nochfaarer no Flärde am Heinzerbärg. Mir stiige iber Flärde rassig ab und kemme iber e-n-ere Kuewaid obenabe. Langsam tribt uns dr Wind bärguff und mir Plane unseri Ändlandig bi dr Hauptstrooss, aber pletzlig zieht dr Wind rasant aa und mir hän e ordeligs Tämpo druff. Drumm mien mir uff dr Wiise unterhalb vo dr Strooss zer Landig aasetze und e glaini Ryssbaanlandig mache. Alles kai Brobleem, aber drfir mien mir jetzt dr Korb, d’Fläsche und Hille bis zem Auto buggle. S’Glas Champagner hän mir uns drfir eso verdient und erhebe unseri Passagier in Ballonadelstand. E scheeni Ballonfaart findet eso iir Änd.