Am vierte Daag vo dr Ballonwuche Flims, steen mir frie uff und gseen am Himmel e Wulgedeggi. Wo mir uff dr Ballonwiise ans Briefing kemme, maint dr Meteorolog, ass sich die Wulgge no ufflese sotte. Und wirglig, wo mir mit unserem Ballon berait zem Start sin, isch iber uns dr Himmel scho zimmlig frey. Mir starte und faare zerscht ganz dief iber de Huusdächer, damit mir e baar gueti Foddeli vo dr Ballonwiise mache kenne. Denn goots aber obsi und mir sin dr erschti Ballon wo e Windschicht goot go sueche, zem us em Tal z´faare. Mittlerwyyle isch dr Himmel iber dr Surselva fascht wulggeloos und mir hän e gueti Richtig gfunde, zem ins Val Lumnezia (Lugnez) z´faare. Alli ander Balleen folge uns und mir gniesse d’Ussicht uf Ilanz und d’Riunaulta (Rhyschlucht). Dur stiige odder singge vo wenige Meter, kenne mir d’Faartrichtig wäggsle und so wunderscheen ins Tal yyne korrigiere. Mir schigge unseri Nochfaarer uff Ilanz und den wyters nach Vella. Iber Degen starte mir unsere Abstiig und beschleunige das durch abloo vo haisser Luft. Zämme mit em Werner stiige mir rassig ins Tal abe mit ebbe 5 bis 6 Meter pro Sekunde. Langsam wo mir em Bode necher kemme, fange mir dr Ballon ab und stelle iin uf e scheeni Matte, näbe nem Sportblatz. Unseri Nochfaarer, d’Birsigratte sin sofort zer Stell und mit legge dr Ballon zämme und laade nen uff. Do alli Passagier beraits Ballonadligi sin, faare mir grad diräggt in die näggschti Baiz und gnämige uns es Plättli. Unseri Kollege vo dr Abtailig Helikopeter vollfiere mit iirem Materialtransport fir dr Schiilift e wunderscheeni Flugschau.