Mir kemme uff e Startplatz und wärde scho vo Schuelkinder empfange. Si kemme mit an’s Briefing und loose gspannt zue, wie mir uns fir d’Faart vorberaite. Bringt uns dr Wind no Disentis, ins Lugnez odder gar nach Olivone? Mir nämme unsere Passagier Vinzent in Empfang und beraite mit Hilf vo drey Schielerinne dr Ballon vor. Iber Nacht isch es klar gsi und e soo isch es jetzt frisch worde uff em Startplatz. Am Bode het’s Ryffe und alles isch e bitzeli gschtabiger als sunscht. Mir starte als zwaite Ballon und stiige kontinuierlig uff. Bis uff 2500 Meter hän mir fascht kai Wind, erscht driber foots aa laufe. Uff 3100 Meter hän mir e Tämpo vo 40 km/h und uff 3300 Meter scho 50 km/h, aber d’Richtig isch nit ideal, nach Obersachsen wäri dr näggscht meegligi Landeort Lukmanier Pass und das isch nit grad dr Ideali Platz. Mir hän aber kai Luscht nach so kurzer Faart in Obersachsen z´lande, drumm singge mir und finde uff 2600 Meter e Schicht, wo uns mit langsame 10 km/h no Siide trybt. Eso faare mir gmietlig ins Val Lumnezia und schigge unseri Nochfaarer no Vella. Mir gniesse s’Panorama und dr Bligg uff die ganzi Ballonmeuti wo uns hinterhär jaggd. Iber Vella laite mir dr Abstiig yy und singge mit iber 5 Meter pro Sekunde ab, damit mir nit dur e anderi Windschicht z’fescht abtriibe wärde. Grad näbe-n-em Bättschopf vo Vella kemme mir aabe und faare tief iber e baar gwunderigi Kieh und setze dr Ballon uff dr Stroos ab. Dr Buur kunnt uns au go begriesse, numme si Nochbur wyters unde verstrait uff sym Fäld dr frische Alpeduft. No-n-em Zämmepagge stoosse mir uff die Faart mit Glepfmoscht aa und erhebe unsere Passagier in Ballonadelstand. Är wird zem Baron dei Val Lumnezia. Dr Renzo Bluemedaal (ex Mr. Schweiz) faart mit sim Auteli an uns verby, numme dr Doope isch nit grad derte wo-n-er set sii! Drfir het är jetzt widder e freyi Nase.