Guetnacht Maischter Langoor

Mir kemme uff e Startplatz und prepariere unser Ballon fir e Start vor. No-n-em Briefing begriesse  mir unseri vier Passagier fir die hittigi Oobefaart. Wo dr thermischi Wind langsam schwächer wird, feen mir unser Ballon mit tatkräftiger Mithilf vo de Passagier aafoo aabloose und stelle nen uff. Als erschte Ballon starte mir zer Oobefaart und faare mit 10 km/h dr Flem druff und iiberquere d’Baustell bi dr Talstation. Wyters goots dr Hang druff und mir versueche e Streemig z’finde, wo uns zem Stennatobel bringt. Aber es goot aidytig wyter’s dr Hang druff. Drumm stiige mir heecher um e Schicht z’finde wo uns ins Tal zem Startplatz zrugg bringt. Obwool mir bis uff 2000 Meter stiige finde mir nyt geaignets und so goots iber d’Runca und em Val la Rosa no Murschetg. Ganz dief stellt dr Wind ab und mir schlyche iber de Baumwipfel dr Hang druff. Glaini Kinder fraie sich riisig, dass e Ballon numme wenigi Zentimeter iber em Bode an iirem Huus verby faart. Wyters goots dr Hang druff in Richtig Lavanuz, mir schigge d’Birsigratte scho emool no Murschetg. Do rennt pletzlig dr Maischter Langoor d’Via Lavanuz druff, denn iber d’Wiise und verschwindet im Wald. E brachts Exemplar vo ne me Haas isch das gsii. Mir lande und traage dr Ballon zer Stroos, wo d’Birsigratte au scho aakemme. No-n-em Zämmelegge stoose mir mit unsere Passagier uff die scheeni Oobefaart aa und erhebe sii in Ballonadelstand. Es stellt sich denn uuse, ass das unseri letschti Faart gsii isch an dr Ballonwuche Flims 2016. E Danggerscheen an alli, wo drzue byydrait hän, ass mir e soone tolli Zyt in Flims hän derfe erläbe. Mir fraie uns scho uff d’Ussgoob 2017.

Veraltete PHP-Version im Einsatz
Der Seiteninhaber muss die Version auf mindestens 7.3 erhhen.