Dr Dani mäldet am Samschtig, ass dr Start ab em Hochsruckli, wo fir e Sunntig vorgsee isch, stattfinde ka. Mir pagge drum unsere Ballon yy und mache uns no am Samschtig uff e Wääg no Sattel. Zerscht checke mir in unserem Hotel Eierhals yy. Iir händ nit falsch glääse, das Hotel haisst wirgligg eso und Eiere kunnt vom ummeschreye, also Schreyhals. Das Hotel isch in Morgarte, liggt diräggt am Ägerisee und mir kenne das numme empfähle http://www.hotel-eierhals.ch. Denn faare mir zer Talstation vo dr Hochstuckli Baan und feen aa unser Ballon fir e Transport vorzberaite. Alles muess im Korb und im Hillesagg blatz haa. No däm mir alles abglaade hän, wird unsere Ballon uff e Transportgondle verlaade und au mir mache uns uff e Wääg ins Skigebiet. An dr Bärgstation wird unsere Korb beraits uff e Radrac gschnallt und zem Startblatz bim Herreboode transportiert. D’Hille wird mit eme Schlitte vo-ne-me Schneedeff zooge, während mir uns zem e glaine Spaziergang uffmache. Numme unseri Nochfaarerin Nicole het’s Privileg und derf uff em Radrac mitrytte. No 20 Minute dräffe mir uff em Startblatz yy, wo mir unsere Brenner uffrischte und denn alles unter ere Blache abdegge. Denn goot’s ab in d’Baiz Herreboode, wo mir no-n-eme Apéro e ganz e fein’s Fondue verdrugge. E gmietligge Oobe mit alle unsere Balleenlerkollege wird unter em Stärnehimmel mit eme Marsch zrugg durch dr Schnee beändet. No-n-ere geruesame Nacht wärde mir vo-n-eme staalblaue Himmel begriesst. Die erschte Gipfel schyyne scho guldig in dr Morgesunne. Mir faare widder mit dr Gondle uffe und ässe im Herreboode Zmorge. Denn begänn sich alli Teams ze iire Balleen und feen alles fir e Start aafoo vorberaite. Mittlerwyyle sin scho vyyli Gaffer yydroffe und e Reedner mit Mikrofon verzellt iine, was jetzt alles gmacht wird. Jede Pilot derf no in eme glaine Interview s’Beschte vo sich gää, und das ooni Rot z’wärde! No däm dr Dani am Briefing die letschte Infos git, feen alle Pilote aa d’Balleen uffzstelle. No däm d’Rega fir e Rettigsyysatz uff dr Pischte glandet isch, startet dr Dani mit em Hochstuckli Ballon als erschts. Mir folge iim als zwaits, bivor aine no-n-em andere folgt. E wunderscheeni Sicht uff d’Mythe und dr Stoos im Siide und dr Ägerisee im Norde erwartet uns scho gly no-n-em Start. Mir hän e scheeni Drift mit 10 bis 15 km/h in Richtig Sihlsee und mir blaane eso lang uff dere Hechi z’faare, bis mir oobe e freye Luftruum hän. Mir tanze mit gwisse Balleen e regelrächts Ballet und  gseen jetzt scho dr ganzi Ziirisee vor uns. Ainigi Pilote verlange vo dr Flugsicherig e Freygoob und stiige uff iber 3000 müM. Sii mälde uns ass si e schnälleri Schicht hän mit Siidweschtwind. Mir entschaide uns aber no wyter’s diefer z’faare, damit mir den speeter mit däm Siidweschtwind ins Toggeburg kenne faare. Dr Sihlsee isch komplett gfrore und liggt unter e-n-ere Schneedeggi. Wo mir iber Unteriberg sin, wird d’Faart immer langsamer und mir entschaide uns ebefalls bi dr Fluugsicherig e Freygoob z’griege. Kurz druffabe derfe mir fascht uff 4000 Meter stiige und so feen mir aa unserem Ballon greftig yyzhaize. Iber dr Staumuure vom Wägitalersee erraiche mir unseri Heechi und faare mit 30 km/h in richtig Toggeburg. Iber dr Lindteebeni stiige ainigi Balleen ab, zem zer Ändlandig aazsetze. Mir faare aber iber e Ricke diräggt uff Wattwil zue. Rächtzyttig feen mir mit em Singge aa, damit mir iber dr Talmitti zer schnälllaufende Stremig uss sin. Mit 6 Meter pro Sekunde singge mir ins Toggeburg ab und fange dr Ballon gnapp iber em Boode ab. Dr Bodewind losst uns s’Toggeburg druff faare in Richtig Ebnat-Kappel. No däm mir e Hoschspannigslaitig iberquert hän singge mir uff Baumheechi ab und lande no drey Stund ganz sanft uff eme Schneefäld. Dr Ruedi isch mit sym Ballon numme wenigi Meter entfärnt. Das isch scho speziell, will är zwischedure doch meereri Kilometer wyt ewägg gsii isch. Unseri Verfolger sin gly scho zer Stell und so pagge mir dr Ballon wider yy und stoose mit eme Glas Champagner uff e wunderscheeni Faart aa. Natyrligg erheebe mir unseri Passagier in Ballon-Adelstand, eso wie sich das au gheert. Mied aber mit vyyle scheene Bilder vor Auge sinn mir alle Zoobe ins Näscht gfalle. Alle Verantwortliche, wo uns die scheeni Faart ermeglicht hän mechte mir uss Basel e ganz e grosses Danggerscheen saage. Mir kemme au näggscht Joor widder gärn in die scheeni Innerschwyz.