gränzeloosi Sicht

Es isch Biiese aagsait und das vor allem im Baselbiet, drumm stehen mir halt no ne glai weneli friener uff und faare ins Mittelland. Scho uf dr Belcherampe am Jurasiidfuess gseen mir, ass es e wunderbari Sicht uff d’Alpe het. Bi Nebikon dräffe mir zwai anderi Ballonteams und faare no Ettiswil bi Willisau. Derte beraite mir unseri Balleen fir d’Faart vor und starte alli gmainsam am zäh ab säggsi. Langsam stiige mir hecher und sueche die Biise. Uff 1000 müM bikemme mir Faar mit 20km7h in Richtig Langental. will mir nit wänn z’noch an Jura koo, stiige mir wyter’s uff und gniesse uff 2000 müM e wunderscheens Panorama. D’Richtig isch zwoor vyyl besser aber doch seer langsam. erscht uff 2600 müM hän mir denn faart in Richtig Thun mit 20 km/h. Jetzt gseet me d’Alpe vom Säntis bis zem Mont Blanc und im Norde vo de Vogese bis in Schwarzwald. sogar der Rochturm luegt hinter em Gämpestolle fiire. Mir sin jetzt im Ämmital und rund um uns umme wimmlet’s numme so vo Balleen. Ja wär hitte nit in dr Luft isch, dä het definitiv ebbis lätz gmacht. Unseri Gescht gniesse die Faart und sin vellig verwunderet, ass es do oobe wunderbar warm isch. Siidlig vo Huttu entschaide mir uns zem diefer z’goo, um mit dr Biise in Richtig Burgdorf z’faare. Aber mir finde uff em ganze wääg aabe Kai Schicht, wo no lauft. Eso faare mir dief iber d’Buureheef und die saftige Wiise. No iber zwai Stund setze mir zer Landig aa und no däm mir zwai glaini baimli iberfaare setzt dr Korb sanft uff eme teerte Streessli uff. Dr Noochfaarer Urs isch gly zer Stell und mir legge dr Ballon ab und pagge alles widder yy. Im Aaschluss erhebe mir unseri Passagier mit Champagner in Ballonadelstand, bivor mir in e Baiz dislotziere und bim ene Plättli dä wunderscheeni Morge mit dr Haimfaart beände.

Mirjam => Comtesse zum Wauwilermoos
Sabine => Baronin ze Willisau
Mike => Graf vo Huttu
Alex => Baron zu Eriswil