No däm‘s am Voroobe no krefftig bloose het, stehen mir am vieri uff und gseen, ass dr Meteorolog rächt kaa het mit dr Prognose: ideali Verhältnis fir e Ballonfaart. Mir dräffe uns in Diegte, faare uff e Hornusserblatz vo Tennike und beraite unsere Ballon vor. Dr Benj isch mit sim Team ebefalls mit dr byy. Am zwanzig ab Säggsi stiige mir mit em Ballon uff und wärde vo dr goldige Sunne empfange. Während em Uffstiig sueche mir d‘Biise, aber mir finde numme Nord bis Nord-Weschtwind . Uff 2000 müM lauft‘s mit 15 km/h in Richtig Zofinge. Mir hän jetzt scheeni Sicht uff Basel im Hintergrund und au d´Alpe gseet me wunderbaar. Mir gheere am Funk e befrindete Pilot, wo iber Eglffos im Allgäu unterwäggs isch, aber sunscht sin nit vyyli Balleen in der Luft. Mir faare jetzt iber em Hauestai und gseen die alti Yysebaanstreggi unter uns. Unseri Nochfaarer stergge sich im Volg mit eme Glas Milch frisch vom Buurehoof. Zwische Wange und Olte goots wyters in Richtig Rothrist und mir hän e scheeni Sicht uff d’Aare und d’Aarburg. Will mir obe an uns e kontrollierte Luftruum befindet, faare mir immer unterhalb däre Gränze mit dr Absicht iber Pfaffnau abzstiige. Dr Wind drybt uns aber immer meer no Oschte und soo singge mir iber Strängelbach rassig ab. Iber dr Grundschicht hän mir jetzt gueti Faart mit 20 km/h in Richtig Pfaffnau und mir schigge d’Nochfaarer dert aane. Vor Mättewil singge mir uff Baumhechi ab und sueche uns e geaignete Landeblatz. Zwische e-ne-re Baumgrubbe und em Buurehoof faare mir 30 Meter iberem Bode. Vor uns liggt e Weiher mit e-ne-re Fischzucht und mir blaane d’Ändlandig uff ere gmaite Wiise. Mir beruhige no zerscht zwai Ressli, wo sich wundere was denn do am Himmel schwäbt, iberquere e Stromlaitig und setze sanft uff dr Wiise uff. Laider macht dr Petrus naimets s’Fänschter uff und es wird scho wenigi Augebligg speeter rächt boggig, ass mir dr Ballon mien ableege. Mir stelle fescht, ass es doo e richtigs Funkloch isch und weder mit Funk no-nem Händy mir d’Noochfaarer kenne erraiche. No kurzer Zyt aber finde denn au die dr Wääg zu uns und mir pagge dr Ballon yy. Im Aaschluss git’s die obligati Ballontauffi mit eme Gleesli Glepfmoscht, bivor mir uns widder uff e Haimewäg mache. Laider wird uns d’Bise fir wyteri Ballonfaarte an däm Wuchenändi e Strich durch d’Rächnig mache.