Mir dräffe in Diegte unseri Passagier und faare zem Startplatz uf e windgschitzti Wiise. E Balleenlerkolleg isch beraits scho drby, si Ballon uffzstelle. Mir mache uns dra, unsere Korb fir d’Faart vorzberaite und scho bald druffabe stoot dr Ballon und mir sin berait zem Start. Langsam stiige mir hecher und kemme zem Diegtertal uss und hän e scheeni Sicht uff die umligende Derfer und Täler. Gly druffabe zaigt sich au scho d’Stadt mit em Rocheturm. Mir finde wärend dem Uffstiig aber niene die aagsaiti Biise, sondern es goot ganz langsam in Richtig Olte. Drumm stiige mir wyter’s um e Schicht z’finde, wo e bitzeli gschnäller lauft. uff 2000 müM mache mir gueti Faart mit 20 km/h. Es isch aber au do nit wie erwartet e Nordweschtwind sondern e Weschtwind wo uns in Richtig Aarau drybbt. Mir blyybe aber uff däre heche, damit mir e bitzeli Vorwärts kemme und s’Panorama gniesse kenne. Uff dr hechi vo dr Frohburg singge mir abb, um z’luege, ebb mir iber dr Jurakrete kenne e bitzeli no Siide korrigiere. Mir finde 300 Meter iber em Grund e scheeni Schicht wo uns mit 15 km/h via Lostdorf und Schönewert no Köllike bringt. Unter uns liggt dr Golfplatz vo Lostdorf und mir gseen näbe uns s’AKW Gösge. Iber Schönewärd mälde unseri Nochfaarer, ass sii in Gretzenbach uff uns warte. Mir geen iber langsam diefer und hän e scheeni Wiise näbe dr Rytthalle vo Holziken in’s Visier gnoo. Es goot no iber e Hochspannigslaitig und den singge mir abb und wärde vom Chrigu in empfang gnoo. Är isch e Modällballenler und si Vatter isch friener ebefalls Ballonpilot gsii. D’Birsigratte sin ebfalls sofort zer Stell und mir legge dr Ballon zämme. Im Aaschluss stosse mir mit eme Glesli Glepfmoscht uff die scheeni Faart aa und erhebe unseri Pasagier in Ballonadelstand.