Oobefaart im Daalkessel

No-n-em Kindernommidaag, faare alli Ballonteams widder uff e Blatz und beraite sich fir e Oobefaart vor. D’Windverhältnis sin ideal und so starte mir in dr zwaite Wälle mit zwai Passagier vo Flims im Korb. Mir schlyyche zerscht uff Dieffaart iber s’Schuelhuus dr Hang druff, iber die grossi Baustell an dr Daalstation. Es git e glaine Wettbewärb an de Oobefaarte, wär am neggschte dr Marker bim Zyyl uff em Startblatz drifft, gwinnt e Iberraschigsbryys. Will mir gseen, ass alli andere Balleen in Richtig Flimserstai drybe, stiige mir gschnäll hecher und finde e Streemig, wo uns iber e Startblatz zrugg bringt. mirr faare no e glai weneli wyters, damit mir mit em Bodewind widder uff e Blatz zrugg kemme. Bim Abstiig wärde mir aber zem Blatz versetzt und kemme erscht iber em Bach Flem in d’Grundschicht. Derte faare mir wie erwartet widder druff, numme laider 50 Meter näbbe-n-em Startblatz. Dr Luc und dr Philipp hän dr Modällballon widder uffgstellt und anhand vo däm gseen mir, ass der Wind sich änderet. Mir blybe dief und faare iber e Baum und singge hintedra grad widder aabe. Zwysche zwai Faanemäschte dure kemme mir iber dr Feschtbaiz doch no uff e Blatz yyne. S’Zyyl isch e uffblooses Kinderbassin und dr Urs liggt scho als Badenixe drinne. Mir kemme ganz noch, aber vor lutter Lampefieber, will alli zueluege wirft dä Lappi vo-n-eme Pilot dr Marker wenigi Zentimeter näbe statt in’s Bassin. Mir stiige aber nommol und faare e bitzeli iber de Huusdächer vo Flims, bivor mir in eme Garte vo e baar Hyser lande. D’Birsigratte sin au soffort zer Stell und mir pagge zämme. Zoobe gits e Gourmetässe im Zält und im Aaschluss e Glooming fir d’Flimser Bevelkerig.

Veraltete PHP-Version im Einsatz
Der Seiteninhaber muss die Version auf mindestens 7.3 erhhen.