Erscht grad zrugg vo dr Morgefaart, steen scho gly druff abe die näggschte Passagier vor dr Diire. Mir mache uns uff no Diegte und sin gspannt, ebb mr e bitzeli mee Wind finde als am Morge. In Diegte mache mir uns uff d‘Suechi no ne-re gmaite Wiise fir e Start. Mir wärde findig in Richtig Helschte, s‘isch zwor nit gmait, aber dr Buur het uns d‘Erlaubnis gää. Mir beraite unsere Ballon vor, fir dr Start. Das sich aber gar nit so aifach, will sich dr Wind immer widder änderet. Wo mir startglar sin, hebe mir zaggig ab, will‘s am Bode e bitzeli zieht. Kuum sin mir aber iber dr Grundschicht, mergge mir, ass das ganzi numme thermisch bedingt gsii isch. Es isch braggtisch windstill in dr Hechi. Unter uns nämme mir e saumässige Grach woor und frooge uns was das kennti sii. Es Toose wi am Glauselyte in Kissnacht am Rigi odder in dr Altjooreswuche im Haslidaal. Und wirgligg, unter uns lauft e ganzi Härde vo Kieh zem Alpabzuug vo Bämbel. Die laufe aber im Ziggzagg rund im Zyyg umme, ass es scho eeer e Umzug als e Abzug isch. Aber egal, e Alp het‘s jo au kaini. Mir faare ganz langsam in Richtig Waldeburg und singge iber eme Dääli vor Oberdorf abb. Dr Wind dribt uns iber d’Kante vom Rehhag, wo si flyssig am am Glättere sin, und d‘Baim straale uns in de schenschte Herbschtfarbe aa. Es goot wyters iber e Humbel wo d‘Wanderer die letschte Sunnestraale gniesse. Mir entschaide uns im Dääli vo Waldeburg no Langebrugg zer Ändlandig aaz‘setze. Mir mien aber nommol e bitzli uffstiige und in d‘Daalmitti korrigiere. Rassig singge mir ab und lande uff ere scheene Wiise. D‘Birsigratte find im zwaite Aalauf au zu uns und mir pagge dr Ballon zämme. Die vier Ballonfrischling erhebe mir mit Champagner in Ballonadelstand, byvoor mir uns uff e Haimwääg mache.