No Davos Glaris

No sovyyl Droggeiebige sin mir natyrligg ganz giggerig uff’s Ballonfaare gsii. Es git no e glaine Hoffnigsschimmer am Fryttigmorge. Es kennti sich nommol e glains Fänschter uffdue, wo mir e Fäärtli kennte mache. Am Morge frieh, mache mir im Hotel Meteo und gseen uff verschiidene Webcam’s, dass sich d’Bewelkig scho aafoot uffleese. Mir gseen an de Mässtatione und de Wättermodäll, ass es e Faart ins Engadin kennti gää. Am Briefing bestätigt dr Peter Pöschl, ass es im Momänt nit schlächt isch, aber gege Mittag kennti sich dr Wind vo Nordwescht uff Wescht draie. Mir entschaide uns zämme mit eme andere Team, uns rasch uff dr Yysblootere bym Hof Maran vorzberaite und denne vor em Start nommol alles uff em Ipad z’iiberpriefe. Mir begriesse unseri baide Passagier vom Hotel wo uss Belgie stamme und feen dr Ballon aafo usspagge. Dr Entschluss fir e Start stoot, d’Taggtig isch uff 3000-3500 müM z’stiige und e Streemig mit 135-140 Grad z’sueche. Sotte mir das nit ha, denn faare mir diefer iber dr Bärgrugge, wo d’Streemig no Oschte ablänggt und zyyle Davos Frauekirch aa. Langsam stiige mir uff und d’Wulgge hän sich bis uff e baar wenigi, wo no an ainzelne Häng glääbe uffgleest. Zerscht sin d’Wind seer variabel, aber ab 2700 müM kemme mir in Nordweschtwind mit 25 km/h. Laider isch d’Faartrichtig numme zwysche 115 und 125 Grad, was uns im Engadin in e Gebiet mit kaine guete Landeblätz wurdi bringe. Drumm gschnäll wider absingge und Blaan B in Aagriff nää. In dr Zwischezyt gniesse unseri Passagier das wunderscheeni Alpepanorama und au mir schiesse e baar scheeni Fotteli. Mir faare jetzt mit 35 km/h iber d’Bärgkrete am Amselstock und hän die erwarteti  Faartrichtig 110 Grad no Davos Glaris. Die vyyle Schneefälder mit de wunderscheene wällefermige Zaichnige sin aifach unbeschryyblig. Mir gseen jetzt scheen uff Davos yyne und unseri Passagier frooge uns, ebb dass komische Ding am Hang e Schwyzer Oschterai uss Schoggi sig. Mir hän iine denn erklärt, dass das s’Hotel InterContinental sigi, aber mit däm dur e Konkurs no aim Joor, de  Gäldgäber beraits en Ai gleggd worde isch.  Glyy no dr Kreete singge mir diefer und kenne eso scheen in d’Taalmitti faare. Mir singge wyter’s ab , bis mir uff Huusdachhechi sin und faare ganz langsam em Hang entlang iber Baim und Husdächer. Uff eme Schneefäld, kurz vor eme Buurehoof setze mir sanft uff. Dr Buur kunnt uss em Stall und zämme mit sinne Grooskinder, begriesst är uns fraidig und bestuunt dr Ballon. Mir draage dr Ballon uff e noochs Streesli, legge-n-en ab und pagge-n-en yy. Do maint dr Buur Hansjörg: „das git aber Durscht, iir nämmet sicher gärn e Bier?“ und hoolt uns alle e Fläschli Calanda (Härzlige Dangg Hansjörg nommol an däre Stell). Bym Bier warte mir uff unseri Nochfaarer, wo via Chur und Landquart, s’ganze Prättigau druff faare mien. Unseri Passagier unterhalte sich mit em Buur und sin beyydruggt, iber d’Gaschtfrindschaft in dr Schwyz. In Belgie wurde d’Buure mit dr Heygable uff d’Pilote loos goo. Wo d’Nochfaare yydräffe, verlade mir alles und stosse denn zämme no mit eme Glas Champagner aa. So erhebe mir die baide Passagier Martine und Marek in Ballonadelstand. Notyrligg griegt au dr Hansjörg e Gleesli und d’Kinder bikemme e Pin und e Gläber. Im Aaschluss goot’s denn Haime zue, aber nit bivor mir no em Reschtaurant In den Islen e Bsuech abstattet hän. Gschtergt mit eme Plättli, goot’s denn aber via Chur widder die 365 Kurve no Arosa hoch. Mit zwai Faarte isch die Aroser Ballonwuche 2018 fir uns doch no besser usekoo als erwartet. Härzlige Dangg an alli wo am Organisiere vo däre Ballonwuche mitgholfe hän. Dangge au an’s Grand Hotel Tschugge, wo uns in däre Wuche so toll verweent het, mir fraie uns scho uff näggscht Joor, wenn d’Ballonwuche im Jänner widder duuregfiert wird.

Veraltete PHP-Version im Einsatz
Der Seiteninhaber muss die Version auf mindestens 7.3 erhhen.