Start uss em Ämmidaal

Mir dräffe uns frieh am Morge, fir e Faart im Mittelland. Am spetere Morge findet nämmlig d’GV vom Schwyzerische Ballonverband in Knuttwil statt und mir wänn natyrlig rächtzyttig derte sii. Dräffpungght isch bym Galliker Transport, no dr Ussfaart vo Dagmersellen. D’Passagier und s’Team vom Thomas warte scho uf uns. Mir faare no Huttel im Ämmidaal, will mit de erwartete Wind wurde mir eso in d’Region vo Knuttwil faare. Wo mir bym Hornusserblatz yydräffe, isch beraits es Team vo dr Ballongruppe Vordemwald bym usspagge. Mir begriesse das Team und feen aa mit dr Vorberaitig vo unserem Ballon. Kurz no de Siibeni starte mir, grad wod’Sunne iber em Horrizont uffgoot. Bi däre tolle Stimmig stiige mir langsam hecher und hän vor uns die ganzi Alpeketti. Au dr Thomas startet wenigi Minute nach uns und mir stiige uff 2000 müM um in die erwarteti Siidweschtstreemig z’koo. Mir mache jetzt e gueti Faart mit 25 km/h, doch d’Richtig isch eher no Oschte. Unter uns liggt scheen d’Stadt Willisau und mir gseen scheen uff’s Wauwilermoos. Mittlerwyle sin iberall Balleen uffgstiige und mir wärde vo unserem Verainskolleg Toni mit em Grubbeballon am Funk begriesst. Mir singge ab um e Streemig z’finde, wo uns meer in Richtig Knuttwil bringt. Es isch aber in de untere Schicht seer Windstill und so entschaide mir uns widder hecher z’stiige und iber e Sämpachersee z’faare. Unter uns isch dr Mauesee und mir gseen scheen uff’s Paraplegikerzentrum in Nottwil. Gnapp unter dr TMA vo Ziiri faare mir iber e See, wo wie ne Spiegel doo liggt. Numme e baar Ruederer ziehn iiri Runde und en erschti Propällermaschine fliegt unter und duure. In dr Neechi vo Eich kemme mir widder iber Land und feen mit em Abstiig aa. Glychzyttig schigge mir unseri Noochfaarer no Vogelsang, damit si bi dr Landig in dr Nechi sin. Iber eme Sportblatz verlangsame mir unsere Abstiig und faare iber e Rossstall, wo aber alli Resser ganz ruhig blyybe. Uff ere scheene Wiise hinter em Stall setze mir zer Landig aa, wo mir pletzlig e verdächtigs Gschmäggli regischtriere. E bschytteti Wiise wänn mir jetzt wirgligg nit grad nää. E halbe Meter iber em Bode faare mir drumm in Richtig teerti Stroos, wo d’Birsigratte beraits uff uns warte. Die letschte Meter bis zer Stroos wärde mir no vo iine zooge. Mir legge dr Ballon scheen uff das teerte Streesli und pagge alles zämme. Im Aaschluss stoosse mir mit eme Gleesli Glepfmoscht aa und erhebe unseri Passagierin Priska in Ballonadelstand. Numme grad e baar wenigi Minute z’spoot dräffe mir in Knuttwil yy und hän numme grad d’Begriessig verpasst.

Veraltete PHP-Version im Einsatz
Der Seiteninhaber muss die Version auf mindestens 7.3 erhhen.