Bi beschte Bedingige träffe mir uns mit de Passagier in Diegte und faare zämme mit em Ballonteam vom Thomas no Pfaffnau. Will d’Meteorologe eher seer schwachi Wind vorussage geen mir ins Mittelland, will mir in dr Hechi mee Freihaite hän, als im Baselbiet. Uff em Hornusserblatz beraite mir unsere Ballon fir d’Faart vor und instruiere unseri Passagier. Mit an Borad isch e Pape wo sim zääjerige Bueb die Faart uff e Geburtsdaag gschänggt het. Scho sii Pape isch mit iim als zääjerige mit mym Vadder in dr Luft gsii, also e Widerhooligstäter. Ebefalls mit an Bord isch e Glyggekolleg mit siner Beglaitig. Mir starte kurz no de Siibeni und stiige ganz langsam uff. D’Sunne isch beraits d’oobe und mir kisse bym vorbyfaare die anderi Ballonhille ganz lycht. Scho gly no-n-em Start mache mir gueti Faart mit 20 km/h no Oschte. Mir stiige aber wyter’s, zem d’Usssicht kenne z’gniesse. Die ganzi Alpeketti liggt vor uns und mir mache mit unsere Passagier e glai weeneli schwyzer Geographie. In de hechere Schichte isch es aber fascht windstill und dr Thomas verlangt freygoob vo Ziiri, damit är no wyter’s bis uff 3000 müM stiige ka. Är mäldet aber au derte nit vyyl Wind, weshalb mir uns fir e Abstiig entschaide, mit em Blaan die gschnälli Schicht iber em Boode z’nutze um e bitzeli Vorwärts z’koo. Und wirgligg got’s scheen 300 Meter iber em Bode mit bis zu 25 km/h iber Raide no Reitnau. Mir gseen scheen uff e Flugblatz vo Triengen, wo grad e Pilatusporter am uffstiige isch. Sicher het dä Falschirmspringer an Boord, wo dä scheeni Morge mit eme Sprung wänn aafo. Fir uns goots wyter’s no Gonteschwyl bi Rynach, wo im Wald näbe uns aine grefftig am yyfiire isch und die ganzi Gegend yyraicheret. Mir gseen jetzt scheen dr Hallwilersee wo wie ne Spiegel ganz flach vor uns liggt. Es het numme e baar Ruederer wo iiri erschte Runde ziehn. Mittlerwyle isch es eso warm, ass me nur no e T-Shirt bruucht und das in dr Mitti vom Abrille! Mir schigge unseri Noochfaarer um e Hallwilersee umme und blaane unseri Ändlandig im Ruum Boswil. Iber em Wyler Niesebärg singge mir ab und sofort wärde mir langsamer. No kurzer Faart iber em Boode setze mir no iber zwai Stunde uff eme Fäld uff und trage dr Ballon zer noche Strooss und legge-n-en ab. Dr Nochfaarer isch no unterwäggs und mir nuzze d’Zyt zem d’Hille entz’leere. Drno pagge mir alles widder in Aahänger und stosse mit eme Gleesli Glepfmoscht uff die scheeni Summerfaart aa. Natyrlig erhebe mir unseri Passagier au in Ballonaadelsstand. Uff dr Ruggfaart git’s no e kurze Halt im Motel bivor mir widder no Diegte faare.