E Haissluftballonfaart

Bi zwaiedrissig Graad dräffe mir uns am speetere Nommidaag mit unsere Passagier und mache uns uff e Wääg fir nach Diegte. Mir finde naimets es Schatteblätzli, wo mir unsere Ballon fir d’Faart kenne vorberaite. Dr Schwaiss fliesst heftig, haisst’s ächtsch dorum Haissluftballonfaart? Am viertel vor Siibeni sin mir berait zem Start und hebe langsam ab. Im Norde het’s iber em Schwarzwald es glainers Gwitter, aber das isch wyt gnueg ewägg, damit es uns nit steert. Mir stiige langsam hecher und sueche e Schicht, wo’s e bitzeli Wind het. Langsam gseen mir ins Mittelland und Bärge kemme fire, was fir die Jooreszyt doch eeher ungweenlig isch. Normalerwys het’s maischtens vyyl z’vyyl Dunscht im Mittelland. Mir gseen au dr Rocheturm in Basel und vom Brand am Rhyhaafe gseet me guet d’Rauchwulgge. Mir sin mittlerwyle uff 2000 müM und gniesse aifach dä scheeni Oobe. Es isch jetzt aagnäm mit dr Tämperatur und nit wie erwartet seer haiss, aber laider isch nit vyyl Wind vorhande. Mir singge drumm widder diefer, um inere Schicht mit ere schwache Biise no Oberdorf zfaare. Mit maximal 6-7 km/h, schlyyche mir via Bämbel (Bennwil) no Oberdorf. Mir versueche meegliggscht nerdlig vo dr Hiigelketti vom Passwang z’byybe, will derte d’Meegligkaite zem e geaignete Landeblatz z’finde eeher dirftig sin. No anderthalb Stunde faart tribts uns aber bletzlig mit 15 km/h genau in Talverängig bi Waldeburg. Mir entdecke aber in dr Talmitti vo Waldeburg e baar Fääne wo s’Taluss waihe. Drumm singge mir ganz dief iber e Wald und unseri Faart stoppt sofort. No ne baar Augebligg foot dr Ballon im Schritttämpo aa widder zem Taal uss z’faare. D’Froog isch jetzt numme, ebb mir eso iber e glaini Krete kenne faare, odder ebb derte unseri Hille beraits scho widder vo dr andere Richtig aagstreemt wird. Numme 20 Zentimeeter iber de Baim goots langsam iber die Kreete und hinte draa singge mir widder em Hang entlang drab. No kurzer Faart iber e Buurehof, wo uns d’Kieh e bitz verdutzt uss dr Stalldiire aaluege, setze mir uff ere Wiise ab und no aim glaine Hopser stehen mir uff dr teerte Stroos. D’Birsigratte finde gly scho dr Wääg zu uns und mir leege dr Ballon uff eme frisch gmaite Stiggli zämme. Im Aaschluss genämige mir uns e Schliggli Glepfmoscht und erhebe unseri Passagier bym Sunneuntergang in Ballonaadelstand. Bi Uffschnitt und Kääs warte mir jetzt uff e Bluetmoond und wärde vo zwai Reeli wo iber s’Fäld seggle begriesst. Au dr Bluetmond gseen mir denne doch no, wärend aber d’Fraue eeher ebitzeli entdyscht sin, zaige sich d’Männer vo dr romantische Syte.

Veraltete PHP-Version im Einsatz
Der Seiteninhaber muss die Version auf mindestens 7.3 erhhen.