Ab in Bärner Jura

Zem zwaite Mool an däm Wuchenändi, dräffe mir uns mit vier Passagier fir e Oobefaart. Mir faare no Biesserach, zem e geaignete Startblatz z’sueche. Lut Prognose wärde Wind uss Weschte erwartet. No ainigem Sueche wärde mir im Induschtrieviertel vo Biesserach findig. Mir beraite unsere Ballon fir e Start vor und hebe am viertel vor Siibeni ab. In de untere Schichte faare mir ziigig no Siide in Richtig Erschwil. Drumm stiige mir zaggig hecher, wo mir aber praggtisch am Ort stoo blybe. Scho glyy gseen mir uff Basel yyne und au dr Flugblatz gseet me sehr guet. Mittlerwyle sin mir an dr untere Gränze vom Luftrum fir e Siidaaflug vo Basel und riefe dorum Info Basel uff. Derte isch aber vyyl loos und mir versueches wyter’s vergäbens in fimf Minuteabständ. Dr Controller git uns aifach kai Antwort. Will mir also nit in Weschtwind uffstiige kenne, bruche mir en Alternativblaan. Mir singge ab und faare mit 15 km/h no Siide. Wenn die Richtig so blybt und au nit schwecher wird, denn kenne mir no Wälscherohr faare odder gar ibere Wyssestai no Solothur. Mir gseen jetzt scheen ins Beggi vo Délémont und schigg unseri Nochfaarer ibere Passwang no Mümliswyyl. Mir faare jetzt iber Higel, Ortschafte und Buureheef, wo die maischte vo uns werde gsee no ghert hän. E wunderscheeni Gegend und uff em Fäld unter uns, springt e Reeh iber d’Matte. Will d’Wind oobe immer meer no Siidweschte draie, faare mir jetzt seer dief, damit mir au bi Wälscherohr iber d’Krete kemme, denn wyters im Weschte het’s praggtisch kaini Megligkaite fir uns zem Lande  und s’Aanefaare fir unseri Nochfaarer isch au kuum megligg. Iber Seehof goot’s dr Hang druff iber die letschti Krete und mir gseen uff Wälscherohr aabe. D’Birsigratte dirigiere mir zu uns und faare uff dr Kretehechi bis ins Daal uuse, denn singge mir zaggig ab. Mir wärde no Oschte versetzt und wo mir in Bodenechi kemme stellt dr Wind ab. Mir singge wyters uff Huusdachhechi und faare dief an ere Tanne verby uff e groose Pargblatz z’mitzt im Dorf zue. D’Hille gnapp an de letschte Tannezwyygli entlang singge mir uff e Blatz aabe und lande sanft uff eme Grasflägg. Mir wärde vo vyyle Lyt und Kinder begriesst und unseri Nochfaarer sin au gly zer stell. Mir drage dr Ballon uff e Blatz und legge d’Hille ab. Nadyrlig bikemme alli Kinder e Gläber und en Pin. Mir pagge alles zämme und stosse mit eme Gleesli und eme schene Uffschnittplättli aa. Unseri Passagier erhebe mir mit bassenden Dauffnämme in Ballonadelstand, bivor mir dr Haimwääg in aagriff nämme.

Veraltete PHP-Version im Einsatz
Der Seiteninhaber muss die Version auf mindestens 7.3 erhhen.