Em Bebbi sy Häärz lacht

Frieh am Morgen dräffe mir uns in Scheenebuech fir’s das jeerige Regio Fly In vo dr Ballongrubbe Basel. D’Grubbe fyyrt iir 90-jeerigs Bestoo und das mit e-n-ere spezielle Faart iber d’Stadt Basel. In de Daage vorhäär isch scho mit em Flugblatz Basel alles abgsproche worde und es het uns enorm gfrait, ass sii uns eso häärzlig begriesst und uns eso die Faart ermegligt hän. Alli Team’s hän iiri Balleen am Bode vorberaitet und an-eme Briefing isch allne s’genaue Prozeedere vo dere Faart besproche worde. Uff die Viertel ab Siibeni sin alle Balleen berait gstande zem Start. Mir hän als Leader vo däre Grubbe per Delifon d’Starterlaubnis vom Tower yyghoolt und sin am 7:22 als erschti gstartet. Kuum in dr Luft isch denn dr Kontakt mit em Tower per Funk vorhande gsii und mir sin uff 1500 müM gstiige. Uff däre Heechi hän mir e super Faartrichtig fir iber d’Stadt mit 20 km/h gfunde. Eso faare mir via Hochwald, Neybadrain und Bachlätte genau iber e Baanhof. No däm mir uns an die tolli Sicht uff die scheeni Stadt ebitzeli gweent hän, bemerke mir erscht, ass im Siide hinter em Jura die ganzi Alpeketti z’gsee isch. Was fir e brachts Daag hän mir do verwitscht. Mittlerwyyle sin mir uff dr Pischteaggse aber mir hän uns bewusst e Fänschter ussgsuecht, wo’s kaini Starts uff em Euroairport git. Via Dalbe und Lehemattquatier gots iber d’Birs. Unter uns sgseen mir s’Joggeli und die renovierti Sporthalle. Iber em Haafegebiet vo Blätzbums (Birsfelden) singge mir ab und faare mit dra abfliessende Luft wo vo Rhyfälde här kunnt (also dr Möhlinjet) in Richtig Glaibasel. In dr Schlayse isch grad e Schlappe yygfaare, zem die baar Meter druff z’yberwinde. Uff em Heernli isch es no rächt ruhig und mir blyybe gniegend hoch, ass mr kaini Gaischter uffwegge. Mir sin jetzt scho seer noch bym Rocheturm und mir gseen d’Grääne fir die zwaiti Etappe. Iber e Badisch Baanhof gots, wyters no Glaihynige in Richtig Ryyhaafe. Die neyi Mässhalle gseet trotzdäm guet uss, au wenn si jetzt vylicht nimme so gfroggt isch. Iber em Ryyhaafe stiige mir widder e bitzeli hecher, damit mir nit z’nooch an Flugblatz kemme. Eso goots iber dr Zoll Otterbach und mir hebe profilaggtisch d’ID uuse. D’Nochfaarer steend alli unter uns scheen uffkolloniert vor em Zoll. Wyter’s goots iber s’Gländ vo de Vitrameebel und zem Tylliger Hiigel. Derte singge mir widder ab und faare dief iber Haltinge und luege no-n-eme geaignete Landeblatz. Us de Hyyser begriesse uns vyyli Lyt und am Ändi vo Haltinge setze mir no iber zwai Stunde Faart sanft uff. Unser Nochfaarer isch sofort zer Stell und mir pagge alles scheen zämme. E Aawoonerin isch eso begaischteret, ass si uns und no-ne anders Team grad zeme Kaffi in iirem Garte yyladet. Im Aaschluss dräffe mir uns alli im Waldhuus in dr Hard und stosse uff e scheeni Faart aa. Natyrlig gits au das Joor e Gwinner, wo derf dr wunderscheeni Wanderpokal fir e Joor mithaime nää und das isch dr Werner Beyeler mit em Swisscom Ballon. Allne e Danggerscheen fir das scheene Erläbnis.

Veraltete PHP-Version im Einsatz
Der Seiteninhaber muss die Version auf mindestens 7.3 erhhen.