Ballonwuche in Flims

Wie alliewyyl isch d’Flimser Ballonwuche e fixe Phunggt in unsere Agenda. Syt vyyle Joore raise mir jede Herbscht in unseri zwaiti Haimet im Bündtnerland. Will’s am Samschtig am Morge no e stargge Nord-Siid-Iiberdrugg gha het, und eso in dr Hechi turbulänti Wind erwartet worde sin, het me uff e Briefing und dodrmit uff e Faart verzichtet. Drumm sin alli scho ganz giggerig uff d’Ballonwiise koo, um uns fir e Oobefaart sich vorz’beraite. Aber vorhär isch no e wichtige Phunggt uff em Brogramm gstande. Flims het e neye Ballon gmacht, will dr erschti no 13 Jeerli Dienscht in Ränte gange isch. Wiirdig mit ere Aasprooch und mit eme Glessli Glepfmoscht stoose mir uff d Ballon aa und winsche Iim und sinne Passagier immer scheeni Faarte und guet Land. Denn hebt dr Flimser als erschts zer Oobefaart ab und ereffnet eso die Ballonwuche. Mir mache uns ebefalls dra unsere Ballon uffz’rischte und hebe mit vier Passagier in d’Oobesunne vo Flims ab. Mir stiige sofort zer Grundschicht uss, will derte d’Thermik immer no dr Hang uffziet und finde uff 1300 müM e dynni Schicht wo uns ganz langsam in Richtig Murschetg und Laax drait. Mir gniesse dr Bligg uff s’Dorf und gseen, was alles im letschte Joor ney baut worde isch. Die grossi Stennau Iiberbauig stoot und d’Bauarbeite stehen kurz vor em Ändi. Hinter uns liggt dr Gaumasee diefblau mit aber doch seer wenig Wasser. Au do oobe isch dä troggeni Summer nit aifach verbyzooge. Iber dr Runca Sut gseen mir scheen ins Vallarosa iine und unsere dytsche Kolleg Klaus isch mit sym Ballon scho dief in dr Schlucht inne und faart das Dääli druff. Mir entschliesse uns zem hecher z’stiige und mit ere Siidweschtstreemig no Flims zrugg z’faare. Jetzt zaige sich alli Tschingelhööre, aber will mir nit scho wänn lande, mache mir grad s’glyyche Spiili nommol. 1300 müM no Runca Sut und widder hecher no Flims. Jetzt faare mir aber iber Daalstation Foppa iiber und singge iber dr Poscht zaggig ab. Numme ganz gnapp iber de Huusdächer goots langsam in Richtig Hotel Bellevue, derte sin mir nämmlig z’Gascht fir die ganzi Wuche und wärde vo dr Marianne und iirem Team verweent. http://www.bellevueflims.ch/ . Iber die letschte Giibel goots wyter’s bivor mir oberhalb vom Bellevue sanft uffsetze. No-nem Zämmeleege erhebe mir unseri Passagier uff der Ballonwiise in Ballonadelstand und beände eso unseri erschti Faart vor dr Ballonwuche.

Veraltete PHP-Version im Einsatz
Der Seiteninhaber muss die Version auf mindestens 7.3 erhhen.