Hole-in-one Yyglocht

Bi glarschtem Himmel kemme mir am Sunntig am Morge uff e Startblatz und beraite uns fir e Start vor. No nem Briefing starte mir als zwaite Ballon, mit dr Erwartig, ass uns die Faart in Ruum Thusis und Heinerbärg wird bringe. Zerscht aber faare mir no e bitzeli dief iiber d’Huusdächer vo Flims und versetze uns eso zer sytlich zer Ballonwiise. Drno feen mir als erschte Ballon mit em styyge aa. Langsam kunnt zerscht dr Gaumasee fiire und drno gseen mir gly scho uff Ilanz. Derte liggt no e glains Näbeli iber em Ryy. Mir sin scho uff 2500 müM und hän bis jetzte kaine odder numme ganz weenig Wind. Ab 3000 müM kemme mir in die erwarteti Streemig, aber mir mien feschtschtelle, ass d’Richtig uns nit wie erwartet no Thusis bringt, sondern eher ins Safiedaal, wo nit grad eso yyladend isch zem mit eme Ballon dert z’lande. Mir stiige wyters um z’luege, ebb’s doch no naimets e nytzligi Schicht git. Uff 3600 müM stehen mir aber bletzlig ganz still und no wyter’s oobe goot’s ganz langsam zrugg in Richtig Flims. Mir sin jetzt braggtisch genau iber dr Ruin Aulta (Ryyschlucht) und informiere die andere Pilot iber d’Windsituation. Mir entschaide uns fir en Abstiig und wänn versueche mit dr abfliessende Kaltluft uns s’Daal uss no Bonaduz z’dribble. Langsam wärde die scheene Felsformatione bi Versam greeser und no zää Minute abstiig dauche mir in die Ryyschlucht yy. Iiberwältigt vo däre scheene Landschaft, faare mir langsam iber Baimwipfel no Bonaduz drab. Gege’s Ändi vo dr Schlucht wird die Streemig aber all wie gschnäller und mir kemme nerdlig vo Bonaduz bi Reichenau zer Schlucht uss. Derte hets laider numme seer wenigi glaini Landeblätz, wo fir die Gschwindigkait nit in Froog kemme. Drumm faare mir wyters und wärde aber dr Hang uff in Richtig Kunklerpass driibe. Es blybt uns also nyt anders iibrig, als nommol uff 3000 müM z’stiige und uns esoo in d’Daalmitti z’versetze. Es goot iber dr Ryy und d’Emser Wärgg bivor mir in dr Daalmitti widder zaggig abstiige. Mit 6 Meter pro Sekunde got’s abwärts und erscht kurz vor em Boode fange mir dr Ballon mit zimftige Brennersteess ab. Laider längts us nimmi uff em Fäld vor em Golfblatz abzhogge und eso faare mir wenigi Meter iber em Boode iber dr Golfblatz und d’Driving Ranche. Zwische e baar Baim dure faare mir numme grad 20 Zentimeter iber em Wasserbungger und setze bym Abschlag vom Loch Nr. 3 sanft uff. E baar Glofer hälfe uns dr Ballon ins Rough abzleege, bivor si sich widder iirem Händikäpp dien aanää. D’Birsigratte sin sofert zer Stell und au dr Blatzwart kunnt uns go begriesse und frait sich, wenn mir iine bym 19. Loch no e bsiechli abstatte. Mir legge dr Ballon zämme und stoose mit eme Gleesli Glepfmoscht aa. Drno got’s zem Clubhuus wo mir dr Durscht kenne lesche.

Veraltete PHP-Version im Einsatz
Der Seiteninhaber muss die Version auf mindestens 7.3 erhhen.