E Faart ins Lugnez

Ändligg isch widder gnadeloses guets Wätter aagsait in Flims. Mir kemme voller Erwartige uff dr Startblatz und beraite unsere Ballon fir e Start vor. Am Briefing wärde uns in dr Hechi nerdligi Wind aagsait und mir sin gschpannt, wo aane uns die Faart fiere wird. In’s Ryydaal no Chur odder doch in Richtig Thusis. Kurz no de Achte starte mir mit unsere Passagier und do unsere Stammgascht dr Beat mit im Korb isch, isch jo e scheeni Faart sch fascht garantiert. Mir faare zerscht dief iber d’Dächer vo Flims und stiige denn ganz langsam hecher. Es findet sich wäärend em Stiige aber laider nienets au nur e schicht wo mit mee als 5 km/h lauft. Erscht ab 3800 müM findet sich es Windli, wo uns in Richtig Ilanz bringt. Zerscht mit 8 km/h und speeter uff 4000 müM mit 13 km/h. Mir entschaide uns fir e Faart no Vella im Lugnez und schigge unseri Nochfaarer emoole no Ilanz. Si sin scho iiberaifrig no Bonaduz gfaare und nämme jetzt die alti Stroos via Versam unter d’Reeder. Mir gniesse unterdesse uff däre Hechi e traumhafti Sicht uff alli Bärge in däre Region. Au dr Pilatus, d’Rigi und d’Mythe in dr Innerschwyz kenne mir guet gsee. Dr Beat gniesst dr Bligg uff sini Haimet Brigels und ka uns fascht jede Egge in däre Gegend genau benenne. Natyrlig isch do vorallem au d’Wirtschaftskund gfroggt. Dert git’s die beschte Capuns und doo gäbi’s uuhuere gueti Menü’s zem Zmittag ganz ginschtig. Via Sagogn und Castrisch kemme mir jetzt noo Ilanz. D’Faartrichtig drait all wie mee no Weschte und mir mien innerhalb vo wenige Meter hechi e schicht ussnitze, damit mir nit z’fescht uff dr Bärgkrete ins Lugnez yyfaare. Hinter uns gseen mir jetzt wunderbar in d’Ruinaulta yyne und am hintere Ändi vom Lugnez gseet me au scho Vals. Mir schigge jetzt unseri Noochfaarer ins Lugnez und blaane unsere Abstiig iiber Vella. Mit emme zaggige Abstiig dauche mir ins Daal yy und kemme genau iiber em Hochstuckli Ballon obenabe, drumm mien mir unsere Ballon schö rächtzyttig abbrämse und kemme denn langsam, nur wenigi Meter näbe-n-em andere Ballon uff d’Baumhechi. D’Birsigratte stehen au scho uff dr Hauptstroos berait und mir kenne sii uss dr Luft zu uns uffe lootse. Langsam faare mir iber e baar Hyyser yyne und lande grad näbe-n-em Hoof vom Renzo, em Ex Mischter vo dr Schwyz, und Hille an Hille mit em Hochstuckli Ballon. No-n-em zämme pagge stellt sich natyrlig d’Froog, wo mir ebbis geen go schnappe. No däm dr Beat so gschwärmt het im Korb, entschliesse mir uns no Valendas z’faare und im Gasthaus zum Brunne go Ässe. Definitiv e empfäälenswärte Typ fir alli wo in däre Region sin. So

nimmt die Faart e wiirdigs Ändi.

 

Veraltete PHP-Version im Einsatz
Der Seiteninhaber muss die Version auf mindestens 7.3 erhhen.