Gsteergt mit eme Mitagässe und eme glainem Verdauigsschleefli kemme mir zrugg uff e
Startblatz und beraite uns fir e Oobefaar vor. Mit uns in Korb kunnt d’Irene uss em Hotel Bellevue, wo uns jede Morge mit eme feine Zmorgebyffet duet begriesse. Zudäm drey wyteri Passagier uss dr Region. No nem Start faare mir dief dr Hang uff, iber d’MS Flims (Stenna-Iiberbauig) und tauche ins Stennatobel yy. Unter uns isch d’Brugg vo dr Flimser Umfaarig, wo an däre Stell kurz zem Tunnel uss und wenigi Meter speeter widder im Bärg verschwindet. Mir stiige e bitzeli, damit mir nit Baumwipfel kitzele und faare wyters in Richtig Runca Sura, aber dr Wind drait all’s wie mee in Richtig Murschetg und Laax, drumm stiige mir hecher uff 200 müM und faare mit 15 km/h widder zrugg no Flims. Mir starte dr Versuech, widder uff e Startblatz zrugg z’faare. Mir sin aber immer no e bitzel z’wyt neerdlig, drumm singge mir nommol ab und faare dief in Richtig Murschteg. Die kalti Luft an de Schattehäng voot ganz langsam aa und bringt uns mee no Siide. In dr neechi vom leere See Lag Prau Pulté wo numme unterirdisch mit Wasser gspiise wird stiige mir widder hecher und faare no Flims. Iber dr Ballonwiise feen mir e rassige Abstiig aa, wärde aber laider e bitzeli abdriibe und kemme uff dr Wiise hinter em Schuelhuus obenab. Dr Bärgwind loost uns im Stych und so setze mir sanft uff und draage dr Ballon zem Schuelhuus aabe und mir rieffe d’Noochfaarer zu uns aane. Mir pagge dr Ballon yy und stoose mitenander uff e scheeni Oobe faart aa. Z’Fuess goot’s die wengie Meter zrugg uff d’Ballonwiise.