Minimumdistance

Und wider het’s iber Flims e staalblaue Himmel und mir fraie uns iber e näggschti Faart. D’Vorussage vo dr Meteo zaige, dass e Faart in’s Ryydaal no Bad Ragaz meglig sy kennti. Mir starte kurz no de Achte als zwaite Ballon und faare zerscht e Moole dief iber d’Dächer in Richtig Dorfkirche. Denn feen mir langsam dr Uffstiig aa und gniesse d’Sicht uff e Gaumasee wo vo-n-eme fiine Morgenäbeli verdeggt isch. Wo mir iber d’Hechi vom Flimserstai kemme, erwarte mir ass mir jetzt in Wind kemme. Doch laider trotz stiige bis iber 2600 müM hän mir nie mee als 5-7 km/h. Mir so weenig wind duurt Faart bis zer näggschte Landemeegligkait vyyl z’lang. Dorum singge mir sofort widder ab, damit mir nit scho iber em Flimserstai hänge. Mir finde e Schicht wo uns ganz langsam widder zrugg no Flims bringt. Meter um Meter kämpfe mir uns widder in d’Mitti vom Daalkessel. No iber e Stund kämpfe stiige mir ab und faare dief iber dr Wald und em Wärgghoof vo Flims und lande denn uff ere frisch gmaite Wiise. Laider het das statt e Wyttfaart e Minimumdistance gää, aber d’Faart isch trotzdäm scheen gsii, will mir e wunderbari Färnisicht hän derfe gniesse. D’Birsigratte sin gly zer Stell und dr Luc bikunnt no d’Glägehait mit sinere Droone e baar Uffnaame vom Ballon z’Mache. Im Noochhinein stellt sich uuse, dass das glychzittig die letschti Faart vo dr Ballonwuche in Flims gsii isch. E scheeni Zyt goot z’Änd und mir fraie uns scho uff d’Ussgoob 2019.

poster
Drooneuffnaam
00:00
--
/
--
Veraltete PHP-Version im Einsatz
Der Seiteninhaber muss die Version auf mindestens 7.3 erhhen.