No langer Durschtstreggi, wänn mir ändligg widder emoole dr Ballon zem Sagg ussloo. Bi scheenschtem Wätter faare mir mit em Aahänger no Diegte und dräffe uns mit de Passagier am speetere Sunntignommidaag. Doch iber Diegte hets diggi graui Wulgge und es isch e Wunder, ass es nit saicht. Au s’Mittelland liggt unter e-n-ere gschlossene Wulggedeggi. Mir dräffe dr Benj mit synnere Manschaft und mir beschliesse unseri Balleen vorzberaite und rächne aifach drmit, ass die Wulgge bald abzien. Und wirglig, wo mir berait zem Start sin isch iber uns dr Himmel scho blau und so hebe mir sanft ab und gniesse die scheeni Oobesunne. No dämm ass es in dr Grundschicht no s’Tal ab in Richtig Sissach goot, keert aber dr Wind scho gly, wo mir iber d’Higelkrete kemme. D’Faart goot ganz langsam in Richtig Ammel zue und mir stiige wyters, um e Schicht mit mee Wind z’finde. Iber 1800 müM wird aber dr Wind widder markant schwächer und mir verzichte druff, bi dr Fluugsicherig aazfrooge, ebb mir no heche derfe stiige. Mir hän jetzt uff ca. 1700 müM Faart mit 14 km/h in Richtig Olte. Mir gseen scheen ins Mittelland ibere, wo sich d’Bewelkig ebefalls uffgleest het, und unter uns isch die alti Hauestaistreggi mit em scheene Viadukt in Rümmlingen. Via Kärnikinde und Läufelfinge goot’s iber e Hauestai. Mir versueche megliggscht uff 1800 müM no Weschte z’korrigiere, damit mir nit grad iber Olte kemme, denn bi däre Gschwindigkait bruuchte mir no zwai wyteri Stund, bis mir in Rothrist vorne sin. Drum zyyle mir fir en Ändlandig im Ruum Rickenbach und Wange bi Olte. Mir schigge unsere Nochfaarer uff e Flugblatz vo Olte, e glaini Graspischte fir Sägelfluugi. Iber Rickebach feen mir aa singge und mergge, ass es in dr Grundschicht e Streemig no Oschte het. Mir stiige nommol 100 Meter hecher, zem korrigiere und zyyle denn ganu dr Flugblatz aa. Wie sich’s gheert Funke mir dr Tower aa, aber derte isch kai Bai wo uns kennti Antwort gää. So gänn mir uns d’Landefreygoob aifach sälber und lande wenigi Meter näbe dr Pischte. Es het e baar Securitas vor em Hangar, aber die zugge numme mit de Aggsle und sin begaischteret, ass si die näggschti Nachtschicht derfe in Aagriff nä. Mir draage dr Ballon uff’s Vorfäld und pagge alles zämme. Im Aaschluss gits natyrligg e Gleesli Glepfmoscht und mir erhebe unseri Passagier in Ballonadelstand. Jetzt hoffe mir uff e guete Ballonsummer.