Mir faar ser frieh am Morge in Basel ab, es isch noonig emoole Vieri. Aber fir aimool goot’s nit an Morgestraich, sondern mir wänn no Willisau faare, damit mir als Fiestaballon an dr Schwyzermaischterschaft im Haissluftballonfaare drby sin und eso den Wettkampfpilote kenne zueluege, wie si iiri Uffgoobe in dr Luft leese. No-n-eme kurze Briefing faare mir mit iihaimische Teams no Groswange, denn es sell e Flyin uff Willisau gä, das haisst, e jede suecht sälber mit Abstand e Startblatz und versuecht denn e Zyl uff em Blatz aazfaare. Mir stelle dr Ballon grad uff eme Fäld näbe dr Hauptstroos uff und starte bi traumhafte Bedingige zer Faart. D’Alpe gseet me scho vom Bode uss und hinter uns gseet me scho alli Wettkampfballeen uff uns zue z’faare. Mir stiige hecher und gseen vor uns beraits s’erschte Zyyl fir d’Wettkämpfer, wo mit enere unglaublige Präzision alli ganz nooch iiri Marker abwärfe. Näbe uns isch e Spanische Tailnämer, jo das git’s nämmlig au. Es isch en offeni Maischterschaft, das bedytet, ass es vyyli Usswärtigi Teams het, wo sich mit unsere stargge Schwyzer Nationalmanschaft mechti mässe. Dä Spanier het als Wärbig uff sym Ballon la Rioja und dä faart wie bsoffe. Pletzligg singgt dä in aim Karacho abwärts und kunnt scho Sekunde speter mit eme schwär deformierte Ballon in Himmel gstiige. Dä het aber nit zvyyt Rioja ghaa, sondern versuecht esoo die letschte bar Zentimeter uusezhoole, wo-n-er necher zem Zyyl kunnt. Är muess es uff jede Fall nit schlächt mache, denn är isch dr momentani Leader. Mir faar in der Zwyschezyt in Richtig Willisau und luege aifach, ass mir die Dailnämer nit steere. So kemme mir scheen uff Willisau iine und entschliesse uns, anstell iber em Zylgrytz de-n-andere im Wääg umme z’hänge, aifach die Faart z’gniesse. Unter uns liggt dr Feschtblatz vo dr Willisauer Schwinget, wo morn wird stattfinde. Me gseet scheen die Sägmääl Ring und drumumme groosi Zueschauerbiinene. Mir gseen scheen uff d’Innerstadt yyne und faare mit 20 km/h in Richtig Ämmidaal. Uff dr linnge Syte gseet me scheen dr Napf und hinte dra sin Aiger, Mench und d’Jungfrau zgsee. Mir schigge unsere Nochfaarer no Huttu. Uff unserer Hechi sin jetzt numme noch Fiestaballeen, die andere kämpfe iber em Feschtblatz um jede Zentimeter. Mir entschliesse uns, uff dr Hechi vo Dürreroth diefer z’goo und e scheene Blatz fir unseri Ändlandig z’sueche. No enere kurze Dieffahrt kemme mir uff e scheeni Wiise, wo mir sanft uffsetze. Dr Nochfaarer isch gly uff unserer Hechi und mir kenne iin zue uns lotse. No-n-em Zämmepagge stoose mir uff die scheeni Faart aa und kenne no e baar Frischling dauffe. Denn goot’s zrugg zem Feschtblatz, wo mir no aine nämme.