Mir dräffe uns fir die zwaiti Faart mit em neye Miini Region Ballon mit unsere Passagier in Diegte und faare zem noche Startblatz. Es wird erwartet, dass es in de untere Schichte eher wenig Wind het, aber ab 2000 müM erwarte mir e Siidweschtwind mit iber 40 km/h. Drumm hän mir au e Fluugblaan bi dr Skyguide yygraicht und blaane e Faart in Richtig Waldshuet und Schaffhuuse. No dämm mir alle vorberaitet hän und unseri Passagier instruiert sin, stelle mir dr Ballon uff und starte kurz vor de Siibeni. Wunderbar empfangt uns d’Sunne, wo mir zem Dääli uss stiige und mir gseen aber, ass es im Oschte doch e bitz e greeseri Näbeldeggi het. Vorallem im Dreyegg Bade Olte und Zug gseet die Sach seer dicht us. Mir gseen aber, ass wenn mir iber Waldhuet uss faare, ass mir mit em Näbel kaini Problem derfte ha. Mir stiige uff 1700 müM und hän nie mee als 8-10 km/h. Denn mälde mir uns bi Ziiri Info um e Freygoob zem wyter’s z’Stiige z’bikoo.

Derte isch aber kaine wo uns Antwort git, sondern e Band verwyyst uf en anderi Frequänz. Drumm mache mir das ganze Spiili nommol mit Ziiri Radar. Derte bekemme mir e Freygoob fir Flightlevel 80, was ebbe 2400 müM entspricht. Är sait uns aber scho gly, ass mir eventuell in 10 Minute widder singge sotte. Mir stiige und hän die erwarteti Richtig mit 55 km/h. Jetzt gniesse mir aifach emoole die wunderscheeni Ussicht, wo sich uns bietet. Mir gseen au scho die erschte Airliner wo iber uns d’Schlaufe fliege, damit si denn in Klote kenne go lande. No 10 Minute verwyyst uns dr Lotse an e anderi Freqänz und mir mälde uns dorum bi Ziiri Approach. Mir hän jetzt d’Hoffnig, ass mir doch kenne uff däre Hechi blybe, aber scho gly emoole wyst uns dr Lotse zem singge aa. Mir realisiere, ass uns uff de untere Hechene die blaanti Faart no Waltshuet nit glingt, sondern mir in Richtig Schopfhaim faare. Das isch widerum nit grad s’bevorzugtischti Landegebiet, weshalb mir wyter’s singge und mit dr Biisestreemig in Richtig Sissach zrugg faare. Mir kemme aber seer langsam voraa und au d’Richtig bringt uns immer meer gege Lieschtel. So beschliesse mir nommel wyter’s oobe no Norde zfaare, damit mir in Arisdorf kenne unseri Ändlandig mache. Unseri Verfolger d’Birsigratte schigge mir, no dämm si scho in Ryfälde gsii sin und drno widder no Sissach zrugg gfaare sin, iber d’Sissacher Flue no Arisdorf. Iber  em Bättschopf vo Arisdorf singge mir ab und faare dief iber die letschte Huusdächer, um uff dr erschte Wiise kenne z’lande. Mir wärde vo vyyle Aawoner frindlig begriesst und es wird uns sogar Kaffi aabote. Laider isch aber dr Garte ebitzeli z’glai, damit mir kennte lande. D,Birsigratte steen berait und wänn uns in Empfang nää. Im letschte Momänt trybt uns dr Wind aber widder iber d’Baim und e Bach uff die anderi Syte. Mir stze trotzdäm sanft uff und zien denn dr Ballon am Saili uff die anderi Bachsyte. Derte pagge mir dr Ballon uff ere frisch gmaite Wiise zämme und stoose denn mit Glepfmoscht uff die Faart aa. Au wenn anderscht blaant, isch das trotzdäm e wunderscheeni Morgefaart gsii.