Start im Bodenäbeli

Mir dräffe uns im erschte Morgegraue mit unsere Passagier und faare no Seewe, zer Ponny Ranch. Derte dräffe mir es anders Ballonteam und faare uff d’Ebeni zem Startblatz. Derte begriesse uns zwai Reeli im Bodenäbeli. Mir feen aa unseri Balleen vorzberaite und kurz bivor sich d’Sunne zaigt, derfe unseri Passagier in Korb yysstyyge. Am zwanzig ab Siibeni starte mir ganz behuetsam und dr Luc macht mit dr Droone scheeni Uffnaame, wie mir in die erschte Sunnestraale kemme. Langsam stiige mir wyters und gseen, wie dr Näbel uss em Lauffedaal no Aesch abfliesst. Will mir nit wie erwartet uff 1000 müM e Siidweschtwind finde, frooge mir d’Fluugsicherig in Basel aa. Uff die erschte Versiech erhalt mir kai Antwort und so nutze mir die Zyt zem d’Sicht uff’s Birseggdaal, Basel und dr Flugblatz im Hintergrund z’gniesse. No nem fimfte Aalauf bikemme mir ändligg vom Controller d’Freygoob fir baidi Balleen, zem uff 2000 müM z’stiige. Ändlig bikemme Faart und faare mit 12 km/h in Richtig buebedorf. Mir gseen jetzt scheen im Siide d’Alpe und dass am Jurasiidfuess doch diggere Näbel liggt. Via Lupsige und Buebdorf, faare mir iber Ramlinsburg ins Ergolzdaal yy. Mir entschaide uns drfir, unseri Faart bis Rickebach wyters zieh, um denn e scheens Blätzli fir d’Landig z’finde. Unsere Kolleg singgt iber dr Sissacherfkue ab und setzt sanft näbe dr Haupstrooss uff. Mir faare no 10 Minute wyter’s und mälde uns bi dr Fluugsicherig ab. Denn singge mir rassig ab und dauche in das Dääli vo Rickbach yy. Es isch aber nit wie erwartet ruhig am Bode, sondern mir faare mit 13 km/h in Richtig Wintersinge. Will’s do doch vyyli Hochspannigslaitige het, singge sachte uff Huusdachheechi ab. Mir faare genau uf ainere glainere Laitig entlang und wo die no linggs ewägg drait, kenne mir uff dr frischgmaite Wiise lande. Mir kennte dr Ballon stelle, aber zer Sicherhait lege mir en sofort ab. D’Birsigratte sin sofort zer Stell und mir pagge dr Ballon zämme. E wunderscheeni Faart findet no zwaiehalb Stund si Ändi, aber natyrlig nit ooni, ass mir unseri Passagier in Ballonadelstand erhebe. Im Aaschluss dräffe mir uns mit em andere Team im Restaurant und mir genämige uns es Bierli.

Veraltete PHP-Version im Einsatz
Der Seiteninhaber muss die Version auf mindestens 7.3 erhhen.