Scho am erschte Datum spiilt s’Wätter fir’s Regio Fly In vo dr Ballongrubbe Basel mit. Mir dräffe alli Teams no de Säggsi uf dr Startwiise, visa vie vom Hundesport Spitzwald bi Allschwil. Es isch alles mit em Flugblatz abgsproche und mir kontaktiere vor em Ufstelle nommol dr Tower. Wo alli siibe Dailnämer iiri Balleen berait zem Fille hän, git’s e glains Briefing uf em Blatz. Dr Thomas mit em Je t’aime Ballon macht dr Leader und isch au gychzyttig dr Fuchsballon. Es isch s’Zyyl, meegligscht noch zem Landeblatz vom Fuchsballon z’koo und denn e Marker abzwärfe odder z’lande. Mir starte vor de Halberachti und stiige rasant uff, will mir die Schicht mit em Oschtwind meegligscht gschäll wänn unter uns loo und mir mit em erwartete Siidweschtwind iber d’Stadt kenne faare. So sin mir gschnäll emoole uff iber 2000 müM und faare ganz langsam in Richtig Bachgrabe. Dr Flugblatz liggt scheen vor uns und mir sin praggtisch genau in dr Pischteaggse. Mir stiige wyter’s und uff 3000 müM hän mir e scheeni Drift in Richtig Weil am Rhy mit 18 km/h. Wo mir zwische Häsige und Saint-Louis praggtisch genau iber em Pischteändi sin, starte wider die erschte Fluugi und fliege genau unter uns in-ere Kurve duure. E wunderbare Bligg uf d’Stadt mit em Gnai vom Rhy bietet sich uns vo do oobe und in dr Färni gseet me d’Alpe. Vo so wyt oobe gseet dr Rocheturm aber ebafalls glai uss. Wo mir dr Rhy iberquere liggt vor uns dr Rhyhaafe mit dem baide Beggi ains und zwai und in Weil gseet me scheen die spezielle Hyser vom Vitra Museum. Vor Ötlinge sinke mir ab, damit mir mit em Siidwind in Richtig Kanderedaal kenne faare. Iber Fischinge mäldet dr Fuchsballon, ass är sini Landig in dr Region vo Mappach blaant. Mir ligge aigendlig gar nit schlächt im Renne und versueche alles was dr Fuchsballon macht nooche z’faare. Wo-n-är no kurzer Dieffaart iber e baar Rossställ uff dr Matte ufsetzt, sin mir numme grad e baar hundert Meter hinter iim. Will mir zem Zmittag kai Fondue Chinoise wänn, schone mir die Ressli unter uns und blybe uff 150 Meter iber Grund. Drumm dypfe mir dr Landeort vom Fuchs nit ganz, sondern faare ebbe 150-200 Meter an iim verby. Mir beraite uns ebefalls fir unseri Landig vo, mir hänn doch e Tämpo vo 20 km/h druff und rächne drmit, ass mir e Ryssbaanlandig mache. Aber uf de letschte Meter vor em Bode wird’s markant langsamer und so kenne mir dr Ballon sanft uff eme abgärntete Fäld absetze. Kurz no dr Landig gryfft dr Wind aber au am Bode dure und so mien mir dr Ballon sofort ableege. Wo d’Nochfarer do sin, pagge mir alles zämme und stosse uf e wunderscheeni Faart iber unseri scheeni Haimet aa und erhebe d’Passagier in Ballonadelstand. Im Aaschluss faare mir ins Waldhuus in dr Hard und sin gschpannt ebb mir am neggschte bym Fuchs gsii sin. Wie in eme Hochsicherhaitstraggt kunnt me sich vor, wenn me d’Stroos zer Baiz faart. Alles abgsperrt und mir sinn glygglig, ass mir ooni e Baustamm uf e Näggel z’griege aakemme. Es isch aifach scheen, wenn me vo dr Garteterrass, mit eme Gleesli Wyy ka uf e Rhy kenne abe luege. An dr Rangverkindigung isch es denn definitiv glaar, mir derfe dä Pokal zem dritte Mool mit haime nä. E Danggerscheen an alli Sailnäämer, ass sy sich scheen an alli Vorgabe ghalte hän. Eso kenne mir no mänggmool uf e gueti Zämmearbet mit dr Flugkontrolle vo Basel zelle und iber unseri Stadt faare. In dämm Sinn Adie zämme und à la prochaine mes amis.