Hochstuckli 2020

Scho am erschte Wuchenändi vo däm neye Joorzäänt, isch dr Petrus uns Balleenler woolgsinnt. Es isch staalblaue Himmel fir es Sunntig aagsait und eso faare mir scho am Samschtig mit unserem Aahänger no Sattel bi Schwyyz. Zerscht tschegge mir in unserem Hotel in Unterägri yy und faare denne wyters. Will’s in däm Joor laider gar kai Schnee het, kenne mir dr Ballon statt mit dr Gondelbaan und em Radrac grad sälber bis zem Restaurant Herreboden faare. Es isch aigendligg gar nit z’glaube, ass mir am näggschte Daag in d’Luft geen, denn mir stegge in ere graue Subbe bym Ablaade. D’Organisatore vo Hochstuckli hän kai mieh gscheyt und fir uns e grosse Straife mit Schnee vorberaitet, damit mir unseri Balleen nit in Drägg legge mien. E härzliggs Danggerscheen vo uns drfir. No-n-em Ablaade dräffe mir uns im Restaurant Herrenbode zem obligate Fondue. In dr gmietlige Rundi vo unsere Balleenlerfrinde gniesse mir eso dr Obe, bivor mir denn ins Hotel zrugg faare. Am näggschte Morge isch natyrlig zerscht emool e Bligg uss em Hotelfänschter aagsait. Iber Nacht het me uns e stahlblaue Himmel bis zem Horrizont aanezauberet und no-eme rychhaltige Zmorge, faare mir zer Daalstaion vo dr Hochstuckli Baan. Mit dr Draigondle goot’s dr Bärg druff und mir mache eglaine Spaziergang zem Herrebode hinter. No-n-eme Kaffi feen mir aa, unsere Ballon fir e Start vorzberaite und no neme glaine Briefing goot’s denn loos. Scho gly steen alli Ballee berait zem Start und aine no nem andere hebt ab. Begaischteret wingge die vyyle Kinder uns zue und mir faare zerscht ganz dief, damit mir nach Norde kenne korrigiere. Drno stiige mir hecher und wärde von-ere atemberaubende Ussicht uff d’Alpe begriesst. Vom Alpstai bis zem Niese und imNorde s’Mittelland und dr Jura.  Mir faare in Richtig Buochs und kemme eso näbe dr Rigi iber Vitznau zem Vierwaldstättersee. Jetzt gseet me sogar vo do uss dr Rocheturm in Basel. Mir mälde uns bym Flugblatz Buochs und wärde mit offene Arme empfange. Wenn mir mechte, derfe mir sogar uff em Blatz lande. E so-ne- Yylaadig wänn mir uns nit entgoloo, aber mir bruche no fascht es Stund, bis mir uns im Siide vom Blatz zem Abstiig entschaide. No iber drey Stund lande mir uff em Flugblatz und beände eso die saagehafti Ballonfaart. No-n-em Zämmelegge begriesst uns dr Flugblatzchef Jan und mir stoose zämme mit eme Gleesli Glepfmoscht aa. Natyrligg erhebe mir unseri Passagier au no in Ballonadelstand, bivor mir d’Haimrais aadrätte. Allne wo ebbis fir dä tolli Start drzue bydrait hän saage mir e härzliggs Danggerscheen.