E Stiggeli Freyhait zrugg

No nem Corona Lockdown isch es ändligg widder eso wyt und mir derfe mit em Ballon in d’Luft. Mit e baar zuesätzlige Massnaame, hett dr Bundesroot au fir uns Balleenler s’OK gää. Mir erwarte relativ schwachi Wind in dr Grundschicht und uff 3000 Meter e Nordweschtwind. No dämm uns d’Flugsicherig in Basel zuegsait hett, ass mir derfe uff 3000 müM kenne stiige, raiche mir e Fluugblaan yy und faare no Dittinge uff e Flugblatz. Derte beraite mir alles vor und sin am Viertalabsäggsi startberait. Mir stiige emool langsam, bis hinter em Blaue d’Stadt fiire kunnt und mälde uns bi Basel Info und bikemme sofort d’Freygoob fir Flightleverl 1000, was in etwa 3000 müM entspricht. Wären dem stiige goot’s aber eeher in Richtig Flugblatz. Mir iberfaare d Krete vom Blaue und erscht iber dr Hofstettermatte drait dr Wind uff 2500 müM no Oschte. Uff FL 100 drait dr Wind no Siidoschte und mir mache jetzt 25-30 km/h Faart. Vor uns liggt s’ganze Mittelland und au die ganzi Alpeketti vom Säntis bis zem Mont Blanc isch z’gsee. Im Norde gseet me d’Vogese und vo Montbéliard iber Belfort und Mulhouse no Freiburg. Basel liggt no ganz verschloofe in dr Morgesunne. Mir gniesse dr Momänt und im Mittelland und in dr Oschtschwyz sin ainigi Kollege unterwäggs. Uneri Nochfaarer schigge mir iber e Passwang no Oensinge und mir wärde vo Basel an Züri Radar wyters glaitet. Mir entschliesse uns fir e Wyterfaart uff däre Hechi bis no Vordemwald, damit mir nit iber de grosse Wälder hängge blybe. Unter uns faart ganz langsam dr Handyfläscheballon duure. Iber Vordemwald verlange mir d’Freygoob fir unsere Abstiig und leen dr Ballon mit 5 m/s lo gheie. Uff 1000 müM fange mir iin langsam ab und mache flotti 25 km/h no Oschte. Ab 150 Meter iber em Bode wird dr Wind mergligg langsamer und mit ganz langsamer Drift faare mir iber Reide uss. No de letschte Hiiser geen mir ganz dief und kenne uff ere scheen gmaite Wiise ändlande. Unseri Nochfaarer sin sofort zer stell und mir pagge dr Ballon widder yy. In dr nooche Baiz stosse mir uff e scheeni Faart aa und genämige uns es Blättli.

„Gniesset die neye Freyhaite, aber bitte mit Venunft“