E Sunneuffgangsfaart

Dr Wätterfrosch isch sich nit sicher, ebb jetzt am Samschtig Morge s’Wätter scheen, bedeggt oder rägnerisch isch. Mir schezze aber am Oobe vorhär d’Laag eso yy, ass mir die Faart kenne durefiere. Und wirgligg, wo mir uns am Fimfi am Morge dräffe het’s zwor e baar Wulgge aber merhaitlig isch es klaar. Mir faare no Seewe und dräffe bi dr Ponnyranch e anders Ballonteam und beraite unseri Balleen uff dr Ebeni fir e Start vor. Mit mystische Näbelschwade iber em Bode starte mir und stiige ganz langsam uff 1000 müM. Iber uns isch jetzt dr Himmel wulggelos und mir faare mit 10 km/h in Richtig Sissach. Mir riefe d’Flugsicherig vo Basel uff und erhalte d’Freygoob zem Stiige bi 2000 müM. Mir gniesse die scheeni Ussischt uff Basel und s’Laufedaal. Im Mittelland het’s ebefalls e baar wenigi Balleen in dr Luft. Mir schigge unseri Noochfaarer no Hölstein und faare genau iber s’Schloss Wildestai und mittlerwyle gseen mir im Siide bis zem Pilatus und zer Rigi. Wo mir iber Tenniken sin, gseen mir s’scheene historische Yysebaanviaduggt vo Rümlingen und mir schigge d‘
Nochfaarer wyters no Weislige. Mitlerwyyle sin mir uss em Luftruum vo Basel use gfaare und mälde uns dorum bi dr Flugsicherig ab. Mir entschliesse uns, in dr Region vo Weislige zer Ändlandig aazsetze. Mir faare no iber die grossi Stromlaitig uss und singge denn ab. Am Bode isch es no ganz ruhig und so kenne mir ganz sanft uff ere Wiise uffsetze. D’Noochfaarer sin au sofert zer Stell, damit mir dr Ballon no kenne bis zem Fäldwääg zie, bivor mir en ablegge und zämmepagge. Im Aaschluss erhebe mir unseri baide Passagier in Ballonadelstand und stosse uff e scheeni Summfaart aa.

Veraltete PHP-Version im Einsatz
Der Seiteninhaber muss die Version auf mindestens 7.3 erhhen.