S’Regio FLy In vo dr Ballongrubbe Basel isch vom Samschtig uff e Sunntig verschobe worde, will’s in dr Region doch seer verbraitet Näbel gä het und fir e Faart iber d’Stadt dr Wind aifach vyyl z’schwach gsii wäri. Drumm hän sich elf Ballonteams am Sunntig zwische Allschwil und Oberwil droffe. No-n-eme kurze Briefing beraite sich alli uff e Start vor. Phunggt Siibeni sind mir alli berait und no däm dr letschti Flieger fir die näggschti Stund am Flugblatz abghobe het, bikemme mir vom Controller d’Startfreygoob. Als Fuchsballon starte mir als erschtes und ibernämme au grad am Funk dr Kontakt zur Fluugkontrolle. Mir stiige rassig uff, will in dr Grundschicht e starggi abfliessendi Streemig uns ins Elsass wurdi drybe. Dr Möhlinjet isch also widder aggtiv und beschert uns e näbelfreyi Region. Ab 1000 müM kemme mir langsam in d’Siidweschtstreemig und faare in Richtig Basel. Uff 2300 müM hän mir denn scho 20 km/h druffe und gniesse die wunderscheeni Sicht uff unseri Stadt Basel. Mir sind jetzt genau in dr Pischteaggse und mir gseen e Gasballon wo vo Zurzach här un entgege faart. Mir faare iber d’Burgfäldergränze und Voltablatz, bivor mir dr Rhy iberquere. Unter uns liggt jetzt s’Klybeck und scho bald sin mir iber em Hafebeggi zwai. Mir singge ab, um zem luege, wo mir mit dr abfliessende Luft aane kemme. Es drybt uns aber zrugg zem Rhy und in Richtig Flugblatz, weshalb mir widder stiige und wyters in Richtig Lörrach faare. Dr Gasballon grytz uns und mir Fonke mit em Pilot Stefan. Iber dr Burg Rötteln singge mir ab und schigge unsere Nochfaarer no Wittling, wo mir mechte lande. Ebbe 100 Meter iber Grund faare mir no mit fascht 25 km/h, aber scho gly druffabe brämsts all wie mee ab und wo mir uff Baumhechi sinn, steen mir praggtisch still. Ganz langsam kenne mir uns uff e abgärntets Fäld dribble und setze ganz sanft uff. Soffort leege mir s’Zyylgritz uss, damit die andere Balleen kene versueche e Margger meegliggscht nooch abbzwärfe. Mir sälber legge dr Ballon uff eme Stressli ab ud pagge alles zämme. Es het ainigi Dailnähmer wo rächt nooch an uns aane kemme, aber dr René schafft das mit Abstand am Beschte. Mit ere Ablag vo 2,5 Meter het är zaigt, wieso är Mitgliid vo dr Schwyzer Nationalmaschaft isch. BRAVO! Mir stoosse mit eme Gleesli Glepfmoscht uff die scheeni Faart aa, bivor mir zruggfaare zem Apéro und zer Siigeeerig. E härzliggs Danggerscheen an d’Fluugsicherig vo Basel, wo uns so guet unterstitzt het.