E Faahrt ins Lugnez

No dämm am Voroobe d’Faart laider het miese abgsait wärde, sin mir voller Erwartige am Mäntig Morge uff e Startblatz koo. Es het am Flimserstai oobe no Wulgge wo hängge aber in Richtig Siidweschte isch blaue Himmel. No nem Briefing isch fir uns glaar, ass mir e Faart ins Lugnez blaane mit Landig in dr Region vo Vella. Mir nämme unseri drey Passagier in empfang und fraye uns, ass d’Claudia wo im letschte Joor scho bi uns im Korb gsii isch, widder drby isch. Mir stelle dr Ballon uff und sin kurz no de Achte startberait. No däm dr Platzhirsch Haini uns d’Freygoob git, hebe mir ganz sachte ab und faare zerscht dief iber die umligende Huusdächer. No däm unseri Passagier die erschte Fotteli gschosse hän, stiige mir langsam uff. In dr Zwyschzyt het’s vo Chur hindefiire doch diggeri Wulgge yynegschobe und mir entschliesse uns fir e schnällere Uffstiig, bivor mir untere Wulggedeggi sin. So sin mir dr erschti Ballon wo iber d’Hechi vo de Krete stiggt und in die erwarteti Nordoschtstreemig kunnt. Mir faare uff 2800 müM in Richtig Laax. Mir stiige no ebbis hecher und hän denn genau d’Faart in Richtig Ilanz und Vella mit 30 km/h. Mir gniesse die scheeni Sicht uff d’Schneebärge und unter uns liggt Ruinaulta (Ryyschlucht). Mittlerwyyle sin alli andere Balleen uff dr glyche Heechi und jage uns hintnooche. Mir schigge unseri Nochfaarer Birsigratte no Ilanz und denn druff no Vella im Lugnez. Will mir doch rächt gschnäll vorwärts kemme, feen mir vor Vella mit em Singge aa. Mit iber 5 m/Sek. dauche mir ins Daal yy und scho glyy wird s’Tämpo langsamer. Es schwemmt uns aber in Richtig Daalmitti, ewägg vom scheene flache Beedeli bi Vella. Drumm leen mir dr Balloon bis kurz vor em Boode rassig singge und fangen en uff 80 Meter iber em Boode ab. Derte finde mir e ganz langsams Hüchli, wo uns widder uff’s Bödeli bringt, wo mir den ganz sanft kenne Lande. Im zwaite Aalauf finde d’Birsigratte au zu uns und mir pagge alles zämme. Bym ene Gleesli Glepfmoscht erhebe mir unseri baide Neyling in Ballonadelstand und faare denn zrugg no Flims. D’Obefaart wird den laider wäge boggigem Wind abgsait.

Veraltete PHP-Version im Einsatz
Der Seiteninhaber muss die Version auf mindestens 7.3 erhhen.