Ändligg Summer

Ändligg zaigt sich widder emool dr Summer und mir kenne Ballonfaare. Es isch gottseidangg nimme so frieh am Morge und so dräffe mir unseri Passagier am viertel vor Säggsi und faare no Erschwil zu unserem Startblatz. No däm mir nommol mit em Wätterfrosch Kontakt gha hän, beraite mir dr Ballon fir e Start vor.  No de Siibeni hebe mir ganz sanft ab und stiige zer Waldliechtig uss. D’Sunne begriesst uns beraits am Horrizont und mir gseen scho gly iber d’Krete ins Laufedaal yyne. Iber Zwinge liggt s’obligate Näbeli, aber sunscht hän sich alli Wulgge beraits uffgleest. Mir nämme sofort Kontakt mit em Flugblatz Basel uff und verlange d’Frygoob fir uff 1500 müM. No däm mir die iberkoo hän, stiige mir zaggig und kemme in erwartete Siidweschtwind. Mir faare mit 20 km/h in Richtig Sissach und gniesse aifach die wunderscheeni Stimmig. No dämm mir no e glai weeneli gstiige sin, hän mir beraits e Faartgschwidigkait vo iber 40 km/h druff. Will mir aber wänn vermiide, ass mir in däre Käferzyt no Dytschland kemme, geen mir widder diefer. Mir hän e gueti Sicht uff Basel am Gnay vom Rhy und unseri Passagier iebe sich in Geographie. Iber Ziefe singge mir nommol ebitzeli diefer und sofort wird’s langsamer. Mir faare iber Lupsige und gseen die vyyle hellblaue Schwimmbeggi in de Gärte. Es het aber au ainigi wo eeher no-n-ere Fangophaggig uss gseen. Dief iber de Baim dauche mir in e glains Dääli yy, wo mir uns entschaide zem z’lande. Aber bivor’s eso wytt isch, mien mir mit vyyl Geduld uns Baum um Baum fiire kämpfe. Uff ere frisch gmaite Wiise setze mir sanft uff und wärde vo Kinder fraidig begriesst. Si derfe drfir emool in e Ballonkorb stiige und wärend däm isch unsere Nochfaarer beraits zer Stell. Mir phagge zämme und mit eme Gleesli Glepfmoscht erhebe mir unsere Passagier in Ballonadelstand und beände eso die scheeni Faart.

Veraltete PHP-Version im Einsatz
Der Seiteninhaber muss die Version auf mindestens 7.3 erhhen.