D’Ballonwuche 2021 in Flims naigt sich em Ändi zue und mir wurde gärn nommol e scheeni Faart uss em Daalkessel mache. Und wirgligg, no däm e Front in dr Nacht verbyzoge isch, kennti’s bivor sich dr Feen uffbaut nommol ebbis gää. Mir kemme uf e Startblatz und vo Siide här glaart dr Himmel uff. No nem Briefing stelle mir dr Balloon uff und starte mit drei Passagier. Langsam stiige mir uff und gseen scho vo Ilanz bis uf Ems aabe. Ab 2200 müM faare mir angsam in Richtig Trin Mulin und schigge d’Nochfaarer no Landquart. Uf 3000 müM hän mir 20 km/h Faart in Richtig Chur. Das sich vyyl mee no Oschte als mir erwartet hän, denn mit de Prognose hätte mir e Faart no Bludenz im Eestrych erwartet. Mir stiige no wyter’s und gän unseri Faartrichtig und Gschwindigkait laufend an die andere Teams wyter’s. Au uff 3600 müM isch unseri Faart immer no mit 90 Grad und 25 km/h, so entschliesse mir uns fir e Faart ins Prättigau. Via Knunkelspass faare mir iber dr Felsberger Calanda und hän e scheeni Sicht uff d’Länzerhaid. Im Norde sin Kurfirschte und dr Säntis scheen in dr Sunne, wärend vo Siide här immer Wulgge yynegschoobe wärde. Iber em Ful Bärg faare mir genau uff dr Krete zwische em Prättigau und em Schanfiggerdaal wo no Arosa goot. Mir singge emool uff 3000 müM ab und luege wie d’Richtig derte isch. Damit mir nit am ängschte Dail vom Prättigau abe kemme, stigge mir nommol und faare no wyters no Oschte. Zää Minute speter singge mir widder und faare ins Prättigau yy. Iber Fideris laite mir dr Abstiig yy und fange dr Ballon wenigi Meter iber em Bode ab. Ganz langsam dryybe mir uff e frisch gmaiti Matte zue und setze unter Applaus vo vyyle Kinder sanft uff. Dr Balloon draage mir no e baar Meter bis zer Stross und lege derte wo em Buur dr Mischt ussgange isch dr Ballon zämme. Natyrlig stosse mir mit unsere Passagier uff e scheeni Faart aa und erhebe sii in Ballonadelstand. In dr Baiz vom Nochberdorf git’s denn e feins Zmittag. Laider kunnt jetzt dr Feen und das isch die letschti Faart vo däre Ballonwuche gsii. Wie immer isch es in Flims aifach scheen. E Danggerscheen an alli wo dodrzue bydrait hän.
