Mir kemme zem Startblatz und dr Himmel isch bedeggt mit ere hoche Wulgendeggi. Dr Meteorolog mäldet in de obere Schichte e stargi Südströmig ufgrund vo dr Föhnlaag. Im Glarnerland und Toggeburg isch aber kai Näbel und d’Wind am Bode selle seer schwach sii. Drum Starte mir nach dr Vorberaitig vom Migros Bio Ballon mit em Zyyl Toggeburg. Langsam stiige mir hecher und gniesse d’Sicht uf Tschingelhöre mit em Martinsloch. In dr zwyschezyt isch dr Himmel glaar, numme iber de ainzelne Bärgspitze gits ufgrund vom stärgere Wind e Wolggebildig. Mir faare iber e Flimsestai und gseen unter uns d’Alp Bargis. Die erschte Balleen mälde uff 3000 müM dä erwarteti Südwind mit 35 km/h. Mir stiige ebefalls hecher und mien dr Uffstiig beschleunige, damit mir iber de Bärgspitze e gniegendi Iberhehig hän, um nit in e Rotorwind z’ko. Uff 3500 müM fahre mir am Piz Sardona verby und gseen scheen uf e Gigerwald Stausee im Calfeisental. Wyters goots iber s’Wysstannetal und scho gly gsen mir scheen uff’s Schiigebiet Flumserbärge. Dr Walesee liggt ruhig unter uns im Tal und mir iberfaare dä so zimmlig in dr Mitti. D’Kurfirschte ligge impossant vor uns, mit de scheene teggtonische Schichte im Fels. Unseri Nochfaarer d’Birsigratte schigge mir ins Toggeburg no Ebnat-Kappel. Langsam starte mir unsere Abstiig und sueche uns e geeignete Landeblatz. Iber de Baumkrone fange mir dr Ballon ab und faare in Schritttämpo iber d’Yysebaan und d’Hauptstroos. Wo mi langsam e Huusdach iberfaare und e scheens Fäld aastyre, sin unseri Nochfaarer zer Stell. Mir gän s’Band abe und wärde vo Iine uf’s Fäld abe zooge. So findet e scheeni Ballonfaart iir Ändi. Bi me-ne z’Mittag am Walesee in Wese sitze mir gmietlig zämme und gseen vor unserem innerer Aug no d’Bilder wo mir 2500 Meter wyter obe gsee hän.