{"id":3097,"date":"2017-09-23T16:22:31","date_gmt":"2017-09-23T14:22:31","guid":{"rendered":"http:\/\/horni-ballonfahrten.ch\/?page_id=3097"},"modified":"2017-09-23T17:02:55","modified_gmt":"2017-09-23T15:02:55","slug":"regio-fly-in-2017","status":"publish","type":"page","link":"https:\/\/horni-ballonfahrten.ch\/?page_id=3097","title":{"rendered":"Regio Fly In 2017"},"content":{"rendered":"

[map style=“width: auto; height:400px; margin:20px 0px 20px 0px; border: 1px solid black;“ gpx=“http:\/\/horni-ballonfahrten.ch\/wp-content\/uploads\/Fahrt vom 23.9.2017.gpx“]<\/p>\n

Phingtligg zem kalendarische Herbschtaafang sin d’W\u00e4tterverh\u00e4ltnis perf\u00e4ggt, zem s’Regio Fly In 2017 vo dr Ballongrubbe Basel dure z’viere. No de halber siibne dr\u00e4ffe die ainzelne Teams uff em Hornusserblatz in Tennike yy und beraite iiri Balleen fir e Start vor. am Zwanzig ab Siibeni dr\u00e4ffe sich alli Pilote bim Fuggsballon. D\u00e4 macht in d\u00e4m Joor unsere Presid\u00e4nt dr Thomas mit em Je t’aime Ballon. Es git e Fuggsjaggd und das bedytet, ass ai Ballon vorab startet und alli ander versueche bi d\u00e4m sym Landeort meegligscht nooch e Marker abzw\u00e4rfe. No d\u00e4m am Briefing alli Informiert sin, startet dr Fuggs und die r\u00e4schtlige Pilote feen aa, iiri Balleen uff z’stelle. Mir starte als erschte Verfolger und stiige nur langsam iber de Baim hecher und gniesse dr Sunneuffgang. Mit ere ganz schwache Biise goots in Richtig H\u00f6lstein und mir luege zue, wie ai Ballon no nem andere zer Waldliechtig uffstiggt. Mir gseen mittlerwyle dr Fuggs seer hoch oobe mit eme Weschtwind drfoo faare und so stiige mir ebefalls gschn\u00e4ll uf die Heechi uffe. Im Mittelland hets an dr Aare entlang no N\u00e4bel, aber sunscht isch bis uff’s Laufedaal alles frey. Mir h\u00e4n e gueti Sicht uff d’Stadt und s’gnze Rhydaal druff bis no M\u00f6hlin. D’Sunne schyynt jetzt dur e Wulggedeggi duure, mit ganz spezielli Lichteff\u00e4ggt. Mir mergge, ass dr Fuggs vyyl meer no Siide faart und mir versueche meegligscht e Heechi z’finde, wo uns dert aane fiert. No enere Stund foot dr Fuggs zaggig aafoo absingge und und landet scho bald by-m-ene Waldegge bi Weislige. Mir faare iiber s’Zyyl aber uff facht 2000 Meter \u00fcber Meer und feen aa absingge. W\u00e4rend em Abstiig w\u00e4rde mir aber ainiges no Norde abtriibe und fange dr Ballon kurz iber de Baimwipfel abb. Mir versueche uns esoo no uff die Wiise z’dribble, damit mir derte kennte lande, aber es drait wyters in e schl\u00e4chti Richtig. So stiige mir widder und faare mit dr Biise via Tecknau no diepflige, wo mir uff ere scheene Wiise lande. Unseri Noochfaarer sin au sofort zer Stell und e ganz liebe Aawooer stoot no bivor mir dr Ballon abgleggt h\u00e4n mit Bier und Cola am Korb und begriesst uns ganz h\u00e4rzlig. D’Brauerei die befindet sich no im Rohbau, sunscht h\u00e4t’s sogar e yyhaimisch’s Bier g\u00e4\u00e4. http:\/\/www.diepfi.ch<\/a>. No-n-em Z\u00e4mmepagge faare mir zrugg und dr\u00e4ffe die andere Teams im Waldhuus in Bl\u00e4tzbums (Birsfelden) zem Apero und sin gschpanntm w\u00e4r am negschte zem Fuggs aane koo isch. Im dritte Rang isch dr Ruedi gsii und im zwaite Rang dr Max. Gwunne und dodrmit fir ai Joor Hieter vom Wanderpokal h\u00e4n mir und stoosse drumm uff d\u00e4 Erfolg mit alle aa. Es frait uns, ass unseri Kollege dr W\u00e4g in’s scheene Baselbiet gfunde h\u00e4n und mir fraie uns scho uff d’Ussgoob im 2018. Mir hoffe natyrligg, ass es widder emoole e Faart iber d’Stadt git.<\/p>\n