{"id":3702,"date":"2018-04-22T19:36:18","date_gmt":"2018-04-22T17:36:18","guid":{"rendered":"http:\/\/horni-ballonfahrten.ch\/?page_id=3702"},"modified":"2018-04-23T21:32:25","modified_gmt":"2018-04-23T19:32:25","slug":"summerfaart-im-april","status":"publish","type":"page","link":"https:\/\/horni-ballonfahrten.ch\/?page_id=3702","title":{"rendered":"Summerfaart im Abrille"},"content":{"rendered":"

[map style=“width: auto; height:400px; margin:20px 0px 20px 0px; border: 1px solid black;“ gpx=“http:\/\/horni-ballonfahrten.ch\/wp-content\/uploads\/Fahrt vom 21.4.2018.gpx“]<\/p>\n

Bi beschte Bedingige tr\u00e4ffe mir uns mit de Passagier in Diegte und faare z\u00e4mme mit em Ballonteam vom Thomas no Pfaffnau. Will d’Meteorologe eher seer schwachi Wind vorussage geen mir ins Mittelland, will mir in dr Hechi mee Freihaite h\u00e4n, als im Baselbiet. Uff em Hornusserblatz beraite mir unsere Ballon fir d’Faart vor und instruiere unseri Passagier. Mit an Borad isch e Pape wo sim z\u00e4\u00e4jerige Bueb die Faart uff e Geburtsdaag gsch\u00e4nggt het. Scho sii Pape isch mit iim als z\u00e4\u00e4jerige mit mym Vadder in dr Luft gsii, also e Widerhooligst\u00e4ter. Ebefalls mit an Bord isch e Glyggekolleg mit siner Beglaitig. Mir starte kurz no de Siibeni und stiige ganz langsam uff. D’Sunne isch beraits d’oobe und mir kisse bym vorbyfaare die anderi Ballonhille ganz lycht. Scho gly no-n-em Start mache mir gueti Faart mit 20 km\/h no Oschte. Mir stiige aber wyter’s, zem d’Usssicht kenne z’gniesse. Die ganzi Alpeketti liggt vor uns und mir mache mit unsere Passagier e glai weeneli schwyzer Geographie. In de hechere Schichte isch es aber fascht windstill und dr Thomas verlangt freygoob vo Ziiri, damit \u00e4r no wyter’s bis uff 3000 m\u00fcM stiige ka. \u00c4r m\u00e4ldet aber au derte nit vyyl Wind, weshalb mir uns fir e Abstiig entschaide, mit em Blaan die gschn\u00e4lli Schicht iber em Boode z’nutze um e bitzeli Vorw\u00e4rts z’koo. Und wirgligg got’s scheen 300 Meter iber em Bode mit bis zu 25 km\/h iber Raide no Reitnau. Mir gseen scheen uff e Flugblatz vo Triengen, wo grad e Pilatusporter am uffstiige isch. Sicher het d\u00e4 Falschirmspringer an Boord, wo d\u00e4 scheeni Morge mit eme Sprung w\u00e4nn aafo. Fir uns goots wyter’s no Gonteschwyl bi Rynach, wo im Wald n\u00e4be uns aine grefftig am yyfiire isch und die ganzi Gegend yyraicheret. Mir gseen jetzt scheen dr Hallwilersee wo wie ne Spiegel ganz flach vor uns liggt. Es het numme e baar Ruederer wo iiri erschte Runde ziehn. Mittlerwyle isch es eso warm, ass me nur no e T-Shirt bruucht und das in dr Mitti vom Abrille! Mir schigge unseri Noochfaarer um e Hallwilersee umme und blaane unseri \u00c4ndlandig im Ruum Boswil. Iber em Wyler Nieseb\u00e4rg singge mir ab und sofort w\u00e4rde mir langsamer. No kurzer Faart iber em Boode setze mir no iber zwai Stunde uff eme F\u00e4ld uff und trage dr Ballon zer noche Strooss und legge-n-en ab. Dr Nochfaarer isch no unterw\u00e4ggs und mir nuzze d’Zyt zem d’Hille entz’leere. Drno pagge mir alles widder in Aah\u00e4nger und stosse mit eme Gleesli Glepfmoscht uff die scheeni Summerfaart aa. Natyrlig erhebe mir unseri Passagier au in Ballonaadelsstand. Uff dr Ruggfaart git’s no e kurze Halt im Motel bivor mir widder no Diegte faare.<\/p>\n