{"id":3763,"date":"2018-05-15T17:44:48","date_gmt":"2018-05-15T15:44:48","guid":{"rendered":"http:\/\/horni-ballonfahrten.ch\/?page_id=3763"},"modified":"2018-05-15T18:04:06","modified_gmt":"2018-05-15T16:04:06","slug":"saegelflieger-im-korb","status":"publish","type":"page","link":"https:\/\/horni-ballonfahrten.ch\/?page_id=3763","title":{"rendered":"S\u00e4gelflieger im Korb"},"content":{"rendered":"

[map style=“width: auto; height:400px; margin:20px 0px 20px 0px; border: 1px solid black;“ gpx=“http:\/\/horni-ballonfahrten.ch\/wp-content\/uploads\/Fahrt vom 12.5.2018.gpx“]<\/p>\n

S\u00e4gelflieger im Korb<\/span><\/p>\n

Hitte dr\u00e4ffe mir uns mit unsere Passagier in Biesserach hinte, es handlet sich dorum um vier Pilote vo dr S\u00e4gelfluuggrubbe Dittinge. Mir verschiebe drno zem Schwalben\u00e4scht vo de Fesselflieger in Erschwil, wo innere Waldliechtig liggt. Gmietligg beraite mir unsere Ballon fir e Start vor und instruiere unseri Passagier. Schliesslig muess bi fimf Pilot im Krob glar sii, w\u00e4r s\u2019Zepter in dr Hand het. Wie blaant, starte mir am viertel ab Siibeni und stiige langsam zer Liechtig und zem Talkessel uss und das ganz ooni Schlepper odder Thermik. E wunderscheeni Morgestimmig erwartet uns und scho bald h\u00e4n mir e scheeni Faart in richtig Nunnige mit 15 km\/h. Eso kenne mir scheen unter dr Kontrollzone vo Basel dure rutsche. Die vier Passagier gniesse die ruhigi und langsami Faart, ooni dass sii sich s\u00e4lber mien uff ebbis konzentriere. Es isch anderscht im Ballon, me isch an dr frische Luft, gseet s\u00e4nggr\u00e4cht aabe und me hert vo unde allerlai Grysch. Mir faare via Nunnige in Richtig Raigolzwyl und gseen jetzt scheen uf d\u2019Alpeketti. Im Mittelland hets ainigi anderi Balleen in dr Luft, aber in dr Region sin mir die ainzige. Nu Raigolzwyl kenne mir hecher stiige und kenne eso mee no Norde korrigiere. Jetzt h\u00e4n mir e gueti Sicht uff Basel und s\u2019Rhytal. Mir schigge unsere Nochfaarer in richtig Diegte und entdegge iin kurz druffabe unter uns uff dr Hauptstroos. Es isch interessant wie die vier Pilote es gspyri fir die glainschte Ver\u00e4nderige h\u00e4n, wenn dr Ballon in e anderi Schicht kunnt, spiirt me e glains Windli im Korb odder an Hand dr \u00c4nderig vo dr Perschpeggtive haisst gly: \u00abg\u00e4\u00e4ll jetzt singge mr!\u00bb. Au wenn e S\u00e4gelflieger ebbis anders isch als e Balloon, het\u2019s doch seer vyyl Parallele. Iber Witschperg singge mir widder diefer und blaane d\u2019\u00c4ndlandig im Ruum H\u00e4felfinge. Dr Nochfaarer schigge mir drum au grad dert aane. Iber eme Buurehoof singge mir ab und in dr Grundschicht isch es ganz ruhig. Drumm stiige mir nommel e baar Meter hecher um in richtig ere grosse Wiise z\u2019korrigiere. E wilds Reeh segglet iber e F\u00e4ld, w\u00e4rend d\u00e4m im Gheeg unter uns e baar Kollege druff warte, zem im T\u00e4ller z\u2019\u00e4nde. Mir singge jetzt uff nur no e Meter iber em Bode ab und faare ganz langsam zem nooche Streesli, denn \u00abder Weg ist das Ziel!\u00bb. Bis jetzt unterhalte d\u2019S\u00e4gelfluugpilote sich begaischteret, aber wo mir nur 5 Zentimeter iber e Haag faare und denn sanft uff em Streesli lande, sin si sproochloos! Mir pagge dr Ballon z\u00e4mme und stoose mit Glepfmoscht uff e tolli Faart aa. Us unsere Passagier mache mir natyrligg Ballonadligi und faare denn z\u00e4mme zrugg ins Laufedaal.<\/span><\/p>\n