{"id":4639,"date":"2019-06-02T18:29:42","date_gmt":"2019-06-02T16:29:42","guid":{"rendered":"http:\/\/horni-ballonfahrten.ch\/?page_id=4639"},"modified":"2019-06-02T18:58:59","modified_gmt":"2019-06-02T16:58:59","slug":"grande-finale","status":"publish","type":"page","link":"https:\/\/horni-ballonfahrten.ch\/?page_id=4639","title":{"rendered":"Grande Finale"},"content":{"rendered":"

Die letschti Faart vo dr Schwyzermaischteschaft im Haissluftballonfaare in Willisau isch aagsait und mir sin als Fiesta Ballonteam widder mit drby. No nem Briefing faare mir z\u00e4mme mit andere Teams uff die anderi Syte vo Willisau mir und feen unseri Balleen aa vorzberaite. Scho gly dauche die erschte Wettkampfballeen uff und qu\u00e4tsche sich zwysche uns. Mir stelle unsere Ballon sofort uff und starte, damit die megligscht gschn\u00e4ll ebefalls kenne goo. Mir faare dief in Richtig Willisau Innerstadt und innert wenige Sekunde sin pletzlig ganz vyyli Wettkampfballeen um uns umme. Mit all d\u00e4ne vyyle Blaserbaleen verliere mir d\u2019Ibersicht, ebb jetzt grad aine iber uns isch oder nit und am Funk isch ai Gschnur. So blybe mir aifach ebefalls dief und faare in Richtig Wettkampf Blatz. Do jo hitte e au s\u2019Schwingerfescht in Willisau dueregfiert wird, streeme e Huffe Lyt dur Stadt zer Arena mit de siibe Sagm\u00e4\u00e4lring. Mir gseen jetzt scheen uff d\u2019Hauptgass, wo vo de baide Stadttoor bewacht wird und im Daal wo vo Menznau h\u00e4r kunnt, faare ganz dief ebefalls Balleen in aim Pullgg uff s\u2019Zyyl zue. Mir gseen, ass sich aine vo de Wettk\u00e4mpfer kennti unter uns schlyche und mir h\u00e4tte kai meegligkait r\u00e4chtzyttig aafo z\u2019stiige, will e Wettkampfballon aifach vyyl schn\u00e4ller isch. Drum singge mir aifach uff die glychi Hechi, damit das nit bassiert. E bitzeli speeter git uns aine vo dr Wettkampflaitig dure, ass mir iber uns jetzt kai Ballon h\u00e4n. Mir feen sofort mit rassigem Stiige aa und kenne drby beobachte, wie vyyli iiri Marker ins Zyyl leege. Uff dr Hechi gniesse mir die wunderbari Sicht uff d\u2019Alpe, s\u2019Mittelland und dr Jura. Es isch eso glaar, ass me dr Rocheturm vo Basel seer guet gseet. Mit 15 km\/h faare mir in Richtig S\u00e4mpachersee und mir schigge unseri Birsigmysli no Mauensee. Mittlerwyle h\u00e4n d\u2019Wettkampfpilote iiri Faart be\u00e4ndet, aber mir h\u00e4n no lang nit gnueg. Langsam fiert unseri Faart iber Suhrsee und mir schigge unseri Nochfaarerinne no Berominschter. Mir gseen jetzt scheen dr F\u00e4rnseeturm vor uns und uff em Fluugblatz w\u00e4rde d\u2019S\u00e4gelfluugi parat gstellt. Ortnigsgm\u00e4ss m\u00e4lde mir uns per Fungg derte, aber es git kaine en Antwort. So setze mir e Blindm\u00e4ldig ab und feen mit Singge aa. Iber eme gmaite F\u00e4ld fange mir dr Ballon ab und versueche ganz dief bis zer noche Stroos z\u2019faare. Es het e baar wunderscheeni Hysli do in Berominschter. Vor em Obigst\u00e4rndli setze mir ganz sanft uff und drage die letschte Meter dr Ballon zer Stroos. D\u2019Birsigmysli sin au sofort zer Stell und mir legge dr Ballon ab und pagge z\u00e4mme. Drno gits no e Gleesli und mir dauffe unseri baide Passagier, wie sichs gheert. Im Aaschluss faare mir zrugg, damit mir nit d\u2019Rangverkindigung\u00a0 nit verbasse. Mir gratuliere em Stefan Zeberli zer Vertaidigung vo sym Schwyzermaischtertitel, em Roman Hugi zer Silber- und em Marc Blaser zer Boncemedaille. Au unsere Verainskollege Ren\u00e9 und Benj e h\u00e4rzligi Gratulation zer tolle Laischtig.<\/p>\n