Dr Startschuss zer Ballonwuch in Flims isch gfalle. Bi herrlichem Wätter beraite mir no-n-em Briefing unsere Migros Bio Ballon fir d’Morgefaart vor. Es sin laider numme schwachi Wind aagsait, aber mir hän trotzdäm d’Hoffnig, ass mr wenigschtens no Illanz oder in’s Lugnez kemme. Kurz no de Achte starte mir ab dr Ballonwiise und stiige langsam hecher. Es isch wie erwartet seer schwachwindig, aber drfir sin alli Bärge frisch mit Schnee verzuggert. Langsam stiige au die ander Balleen uff. Unter uns liggt unter eme Näbeli dr Gaumasee und in de Tschingelhöre gseen mir grad dur s’Martinsloch. Mir sin jetzt scho uff 2500 Meter und immer no steen mir iber em Startplatz. Im Mittelland liggt Hochnäbel ab sunscht hän mir e gewaltigs Panorama vor uns. Vo de Kurfirste iber d’Berninagruppe, bis zer Monterosagruppe und zur Jungfrau gsenn mir alles wunderbaar. Mir erraiche 3000 Meter und lngsam nimmt unsere Ballon faart in Richtig Illanz uff. Uff 3300 müM hän mir unseri Faarthechi eraicht. Mit 16 km/h wärde mir in 45 Minute bi Vella im Lugnez sii. Genau iber Vella starte mir unsere Abstiig und singge mit 5 Meter pro Sekunde. Mir kemme genau iber em Kirchespitz vo Vella obenabe und faare tief iber d’Husdächer dr Hang uff. E halbe Meter iber em Stalldach visiere mir e scheeni Wiise aa und lande ganz sanft. Unseri Verfolger, d’Birsigratte sin sofort do und mir trage gmainsam dr Ballon zem e nooche Bedeli. Natiirlig isch d’Baiz grad näbedraa! Mir pagge dr Ballon zämme und gnämige uns uff dr Terasse es Brättli und ebbis zem d’Keele aazfiechte. Das isch dr Start fir hoffentlig e wunderscheeni Wuche in Flims mit vyyle tolle Ballonfahrte.