Sägelflieger im Korb

Sägelflieger im Korb

Hitte dräffe mir uns mit unsere Passagier in Biesserach hinte, es handlet sich dorum um vier Pilote vo dr Sägelfluuggrubbe Dittinge. Mir verschiebe drno zem Schwalbenäscht vo de Fesselflieger in Erschwil, wo innere Waldliechtig liggt. Gmietligg beraite mir unsere Ballon fir e Start vor und instruiere unseri Passagier. Schliesslig muess bi fimf Pilot im Krob glar sii, wär s’Zepter in dr Hand het. Wie blaant, starte mir am viertel ab Siibeni und stiige langsam zer Liechtig und zem Talkessel uss und das ganz ooni Schlepper odder Thermik. E wunderscheeni Morgestimmig erwartet uns und scho bald hän mir e scheeni Faart in richtig Nunnige mit 15 km/h. Eso kenne mir scheen unter dr Kontrollzone vo Basel dure rutsche. Die vier Passagier gniesse die ruhigi und langsami Faart, ooni dass sii sich sälber mien uff ebbis konzentriere. Es isch anderscht im Ballon, me isch an dr frische Luft, gseet sänggrächt aabe und me hert vo unde allerlai Grysch. Mir faare via Nunnige in Richtig Raigolzwyl und gseen jetzt scheen uf d’Alpeketti. Im Mittelland hets ainigi anderi Balleen in dr Luft, aber in dr Region sin mir die ainzige. Nu Raigolzwyl kenne mir hecher stiige und kenne eso mee no Norde korrigiere. Jetzt hän mir e gueti Sicht uff Basel und s’Rhytal. Mir schigge unsere Nochfaarer in richtig Diegte und entdegge iin kurz druffabe unter uns uff dr Hauptstroos. Es isch interessant wie die vier Pilote es gspyri fir die glainschte Veränderige hän, wenn dr Ballon in e anderi Schicht kunnt, spiirt me e glains Windli im Korb odder an Hand dr Änderig vo dr Perschpeggtive haisst gly: «gääll jetzt singge mr!». Au wenn e Sägelflieger ebbis anders isch als e Balloon, het’s doch seer vyyl Parallele. Iber Witschperg singge mir widder diefer und blaane d’Ändlandig im Ruum Häfelfinge. Dr Nochfaarer schigge mir drum au grad dert aane. Iber eme Buurehoof singge mir ab und in dr Grundschicht isch es ganz ruhig. Drumm stiige mir nommel e baar Meter hecher um in richtig ere grosse Wiise z’korrigiere. E wilds Reeh segglet iber e Fäld, wärend däm im Gheeg unter uns e baar Kollege druff warte, zem im Täller z’ände. Mir singge jetzt uff nur no e Meter iber em Bode ab und faare ganz langsam zem nooche Streesli, denn «der Weg ist das Ziel!». Bis jetzt unterhalte d’Sägelfluugpilote sich begaischteret, aber wo mir nur 5 Zentimeter iber e Haag faare und denn sanft uff em Streesli lande, sin si sproochloos! Mir pagge dr Ballon zämme und stoose mit Glepfmoscht uff e tolli Faart aa. Us unsere Passagier mache mir natyrligg Ballonadligi und faare denn zämme zrugg ins Laufedaal.