Mir fraie uns, ass mir wider emoole derfe unseri Frinde in Lozärn bsueche. Mir dräffe drey anderi Ballonteams uff dr Allmänd, näbe dr Swissporarena und no-nere ussgepräggte Begriessigsrundi, feen mir aa unsere Ballon fir e Start vorzberaite. Am halber Siibeni starte mir und stiige langsam uff. Gly scho gseet me in d’Arena yyne und bald zaigt sich dr Vierwaldstättersee im Hintergrund. D’Sunne isch scho doobe und mir stehen grad vor em Huusbärg Pilatus. Mir mälde uns bym Flugblatz Ämme, aber derte isch kaine, es kunnt numme es Bändli. Mittlerwyyle gseet me scheen uff’s Seebeggi bi Lozärn und will mir nit vyyl Wind finde, stiige mir wyter’s und langsam kemme die vyyle Bärgspitze im Hintergrund zem vorschyyn. No nere halbe Stund sin mir uff unsere maximale Hechi vo 3100 müM. Mir sin jetzt iber em Dunscht und gseen die ganzi Alpeketti und vyyli Seee. Alpnacher-, Sarner-, Lungere-, Sämpacher-, Baldegger-, Halwyyler- oder Zugersee um numme die greesere doo z’nenne. No dämm mir fir e halb Stund die tolli Ussicht gnosse hän, singge mir wider ab, zem e Schicht z’sueche, wo e bitzeli gschnäller lauft. Uff ebbis iber 2000 müM kenne mir uns no Norde in Richtig Yygang zem Äntlibuech tribble, bivor mir denn wyters absingge, uff d’Hechi vo de andere drey Balleen. Die sin trotz vyyl diefer  z’faare nämmlig genau glyych wytt. Mit gmietlige 15 km/h faare mir jetzt s’Äntlibuech druff. Es goot iber vyyli scheeni glayni Sittedääli, wo d’Bäch bym drabfliesse tiefi Furche gfrässe hän. Mir gheere vyyli scheeni Glogge vo de Kieh uff de Waide unter uns und d’Nochfaarer, sin mittlerwyle au unter uns. Mir schigge unsere no Hasle und singge wyters uff 100 Meter iber Bode ab. Es goot an drey Ballonschnätzler (Windreeder) verbyy und mir fasse e Gegend zwysche Hasle und Schüpheim fir d’Ändlandig ins Aug. Mir dirigiere d’Birsigratte uff dr entsprächendi Wääg und singge iber ere scheene Wiise ab. Will mir aber uff dr Wiise näbedraa e baar Ressli entdegge, entschaide mir uns nommol Hundert Metter wytter’s z’faare und setze zer Landig aa. Laider wärde mir aber nid wie erwartet in d’Daalmitti driibe, sondern dr Hang zieht uns aa und so hänge mir gena iber em Gilleloch vo-ne-me Buurehoof. Mir stiige nommol 50 Meter uff und bikemme eso e glaine Schupf wo uns iber e scheeni Wiise bringt. Derte setze mir uff eme Wägli ganz sanft uff und beände no fascht zwaiehalb Stund die scheeni Faart. Mir pagge vor stuunende Goofe dr Ballon zämme, bivor die glaine Gnepf emoole derfe in Korb yynehipfe. Zem Abschluss bikunnt jede no e Gläber und en Pin. Mir stosse mit eme Gleesli Glepfmoscht uff die Faart aa und erhebe unseri Passagier in Balloaadelstand. Im Aaschluss dräffe mir die andere Ballonteams in eme Reschtaurant, bivor mir d’Haimrais adrätte.