Nach vyyle Aalaiff isch jetzt ändligg s’Wätter guet und mir faare no Könitz bi Bärn. Derte dräffe mir e anders Ballonteam und faare no Niederscherli und beraite unseri Balleen fir e Start vor. Am Zwanzig ab Nyyni starte mir und mälde uns kurz no-n-em Abheebe bi dr Flugsicherig, will mir in dr CTR vo Bärn gstartet sin. Mir bikemme d’Freygoob bis zem Flightlevel 95, was fascht 3000 müM sin. Mir stiige langsam wyters und gseen scho glyy in Richtig Bärn mit dr Bundeshitte iber em Mazzilli. Ab 1000 müM kemme die erschte Schneegipfel uss em Dunscht fire und mir Faare jetzt no Oschte mit 15 km/h. Uff em Flugblatz Belp starte und Lande die erschte Fluugi und mir stiige wyters bis uff 2500 müM. Jetzt liggt die ganzi Alpeketti vor uns, vom Alpstai, iber e Glärnisch und Tödi, Jungfrau, Aiger und Mench, bis zem Montblanc. E aimoologs Panorama, wo numme die scheeni Schwyz biete kaa. D’Fahrt Richtig het jetzt uff Siidwescht gwäggslet und mir entschaide uns fir e Faart bis no Gerzesee um denn mit dr diefere Streemig ins Ämmidaal z’faare. Iber Toffe faare mir ins Kabbisland Gürbedaal yy und hän e scheene uff’s Stockhorn und e Naturpark Gantrisch. Iber em Gerzesee singge mir ab und verabschide uns au vo dr Fluugsicherig in Bärn. Bi Oberdiessebach faare mir ins Ämmidaal yy und iber em Churzebärg singge mir uff Baumhechi ab. Ganz langsam dryybe mir in Richtig Linde, wo mir uns e Landeblätzli wänn sueche. Unter uns lauffe Ree iber e Wiise und verschwinde im Wald. Wo mir langsam in d’Daalmitti kemme kenne mir scheen d’Landig vom andere Ballon mitverfolge. Es het am Bode doch e bitzeli Wind und so beraite au mir uns fir d’Landig vor. Mir faare ganz dief iber e gmischteti Wiise und setze am Ändi uff und blybe denn in dr Aagränzende Wiiise stoo. Es glingt uns dr Ballon no bis zer Nooche Stroos z’draage und legge denn d’Hille ab. Unsere Nochfaarer isch sofort zer Stell und mir phagge alles yy. Im Aaschluss stosse mir mit Glepfmoscht uff die scheeni Faart aa und erhebe unseri baide Passagier in Ballonadelstand. In eme nooche Gaschthoof kheere mir no yy, bivor mir dr Haimwääg aadrätte.